धनुषामा झाडीबाट गाँजा बरामद 

जनकपुरधाम/भदौ १८ गते। झाडीमा लुकाएर राखिएको ठूलो परिमाणको अवैध लागूऔषध गाँजा धनुषा प्रहरीले बरामद गरेको छ।

जिल्लाको नगराइन नगरपालिका–५ स्थित खिरखिरिया जाने भित्री सडक किनारको झाडीबाट प्रहरीले १०७ किलो ९९८ ग्राम गाँजा बरामद गरेको हो।

गएराति करिब २:३० बजे उक्त क्षेत्रमा गाँजा लुकाएर राखिएको गोप्य सूचनाका आधारमा इलाका प्रहरी कार्यालय लग्मा जटहीबाट खटिएको प्रहरी टोलीले सो गाँजा बरामद गरेको जिल्ला प्रहरी कार्यालय धनुषाले जनाएको छ।

प्लास्टिकमा बेरिएका नौ वटा पोकामा उक्त गाँजा फेला परेको थियो। बरामद सामग्री जिल्ला प्रहरी कार्यालय धनुषामा ल्याई प्लास्टिक हटाएर तौलिँदा गाँजाको खुद तौल १०७ किलो ९९८ ग्राम कायम भएको प्रहरीको भनाइ छ।

घटनामा संलग्न व्यक्तिको पहिचानका साथै गाँजाको स्रोत र गन्तव्यबारे थप अनुसन्धान भइरहेको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक (डिएसपी) ओमप्रकाश खनालले जानकारी दिनुभयो।

धनुषा प्रहरीले अवैध लागूऔषधको ओसारपसार तथा कारोबार नियन्त्रणका लागि निगरानी र कारबाहीलाई निरन्तरता दिँदै आएको छ।