गुणस्तरीय शिक्षासँगै विद्यालयमा खेलकुद विस्तार सरकारको प्राथमिकता : मन्त्री सस्मित पोखरेल

जनकपुरधाम/साउन ११ गते । शिक्षा तथा खेलकुद मन्त्री सस्मित पोखरेलले गुणस्तरीय शिक्षासँगै विद्यालय तहमा खेलकुद गतिविधिको विस्तार सरकारको प्रमुख प्राथमिकतामा रहेको बताएका छन्।

जनकपुरधामस्थित संकट मोचन देवशरण रामरती माध्यमिक विद्यालय मा आयोजित कार्यक्रममा विद्यार्थीलाई खेल सामग्री वितरण गरेपछि सञ्चारकर्मीसँग कुरा गर्दै मन्त्री पोखरेलले विद्यार्थीको सर्वाङ्गीण विकासका लागि अध्ययन र खेलकुदलाई समान महत्व दिनुपर्ने बताएका हुन्। उनले खेल सामग्रीको उपलब्धता तथा आवश्यक खेल पूर्वाधार निर्माणमा सरकारले विशेष ध्यान दिइरहेको उल्लेख गरे।

उनका अनुसार खेलकुदले विद्यार्थीमा अनुशासन, नेतृत्व क्षमता, आत्मविश्वास तथा स्वस्थ जीवनशैलीको विकास गर्ने भएकाले विद्यालय तहदेखि नै खेल संस्कृतिको विकास गर्न आवश्यक छ। यही उद्देश्यअनुरूप सरकारले सामुदायिक विद्यालयमा खेल सामग्री वितरण, विद्यालयस्तरीय प्रतियोगिता सञ्चालन तथा प्रतिभाशाली खेलाडी उत्पादन गर्ने विभिन्न कार्यक्रम सञ्चालन गरिरहेको उनले जानकारी दिए।

मन्त्री पोखरेलले शिक्षा क्षेत्रको समग्र सुधारका लागि प्रदेश सरकार बहुआयामिक रूपमा अघि बढिरहेको बताए। उनले हालै राजर्षी जनक विश्वविद्यालय का उपकुलपतिसँग शैक्षिक गुणस्तर अभिवृद्धि, प्रशासनिक सुधार तथा भौतिक पूर्वाधार विकासका विषयमा विस्तृत छलफल भएको जानकारी दिँदै विश्वविद्यालयको आफ्नै भवन निर्माण, घेराबार तथा जग्गा व्यवस्थापनलाई प्राथमिकताका साथ अघि बढाइएको बताए।

विश्वविद्यालयलाई व्यवस्थित, गुणस्तरीय तथा प्रतिस्पर्धी शैक्षिक संस्थाका रूपमा विकास गर्न सरकार आवश्यक सबै सरोकारवालासँग समन्वय गरेर काम गरिरहेको उनको भनाइ थियो।

मन्त्री पोखरेलले मधेश प्रदेशलाई साक्षर प्रदेश घोषणा गर्ने प्रक्रिया अन्तिम चरणमा पुगेको जानकारी दिँदै आवश्यक प्रतिवेदन प्रदेश सरकारसमक्ष बुझाइसकिएको र कार्यान्वयन प्रक्रिया अगाडि बढिरहेको बताए। शिक्षा क्षेत्रमा अझै केही चुनौती बाँकी रहे पनि संरचनागत सुधार, गुणस्तरीय शिक्षण–सिकाइ, शिक्षकको क्षमता अभिवृद्धि, विद्यालय व्यवस्थापन सुदृढीकरण तथा विद्यार्थीमैत्री वातावरण निर्माणलाई सरकारले उच्च प्राथमिकतामा राखेको उनले बताए।

सरकारले शिक्षा क्षेत्रमा देखिएका समस्याको समाधानमा ढिलाइ नगर्ने नीति अवलम्बन गरेको उल्लेख गर्दै उनले कुनै पनि विषय सार्वजनिक भएलगत्तै सम्बन्धित निकायलाई सक्रिय बनाइने बताए। पछिल्लो समय सार्वजनिक भएको प्रश्नपत्र बाहिरिएको घटनामा २४ घण्टाभित्रै मुख्य आरोपी पक्राउ परिसकेको र थप अनुसन्धान जारी रहेको जानकारी पनि उनले दिए।

यसअघि आयोजित कार्यक्रममा मन्त्री पोखरेलले विद्यालयका विद्यार्थीलाई भलिबल, क्रिकेट, ब्याडमिन्टनलगायत विभिन्न खेल सामग्री हस्तान्तरण गरेका थिए। कार्यक्रममा विद्यालयका शिक्षक, विद्यार्थी, अभिभावक तथा स्थानीय जनप्रतिनिधिहरूको उल्लेखनीय सहभागिता रहेको थियो।

मन्त्री पोखरेलले देशभरका सामुदायिक विद्यालयमा खेलकुद गतिविधिको दायरा अझै विस्तार गर्दै आवश्यक सामग्री उपलब्ध गराउने, विद्यालयस्तरीय प्रतियोगितालाई नियमित बनाउने तथा राष्ट्रिय तथा अन्तर्राष्ट्रिय स्तरमा प्रतिस्पर्धा गर्न सक्ने दक्ष खेलाडी उत्पादन गर्ने लक्ष्यका साथ मन्त्रालयले विभिन्न कार्यक्रम सञ्चालन गरिरहेको बताए।