धनुषामा होटल र किराना पसलमा अनुगमन, मापदण्ड उल्लङ्घन गर्ने होटललाई २५ हजार रुपैयाँ जरिवाना

जनकपुरधाम/असार १७ गते। उपभोक्तालाई अस्वच्छ तथा गुणस्तरहीन खाद्य सामग्री बिक्री भइरहेको गुनासो बढ्दै गएपछि धनुषाको पूर्व–पश्चिम राजमार्गअन्तर्गत लालगढ र ढल्केबर क्षेत्रमा सञ्चालित होटल तथा किराना पसलमा बजार अनुगमन गरिएको छ।

मधेश प्रदेश सरकारको गृह, कानुन तथा सञ्चार मन्त्रालयको समन्वयमा खाद्य प्रविधि तथा गुण नियन्त्रण कार्यालय, जनकपुर र जिल्ला प्रशासन कार्यालय धनुषाको संयुक्त टोलीले बुधबार होटल तथा किराना पसलहरूको निरीक्षण गरेको हो।

अनुगमनका क्रममा धेरैजसो होटलले खाद्य स्वच्छतासम्बन्धी न्यूनतम मापदण्डसमेत पालना नगरेको, म्याद नाघेका खाद्य सामग्री भण्डारण गरेको तथा पटक–पटक प्रयोग गरिएको अखाद्य तेलमा खाना पकाउने गरेको भेटिएको अनुगमन टोलीले जनाएको छ।

लालगढस्थित बौवा होटलमा पुनःप्रयोग गरिएको तेलमा पकाइएको करिब १५ किलोग्राम माछा र मासु फेला परेपछि उक्त खाद्य सामग्री नष्ट गरिएको छ। खाद्य ऐनविपरीत कार्य गरेको ठहर गर्दै होटललाई २५ हजार रुपैयाँ जरिवाना गरिएको टोलीले जानकारी दिएको छ।

यसैगरी लालगढ र ढल्केबर क्षेत्रका गौतम, पुकार, थापा, कोमल लगायत नौ वटा होटल तथा केही किराना पसलमा पनि अनुगमन गरिएको थियो। निरीक्षणका क्रममा भेटिएका म्याद गुज्रिएका खाद्य सामग्री तत्काल जफत गरी नष्ट गरिएको जनाइएको छ।

अनुगमन टोलीले होटल तथा पसल सञ्चालकलाई स्वच्छ र ताजा खाद्य सामग्री मात्र प्रयोग गर्न, खाद्य स्वच्छतासम्बन्धी मापदण्डको पूर्ण पालना गर्न, मूल्यसूची अनिवार्य रूपमा राख्न तथा उपभोक्तासँग तोकिएकोभन्दा बढी मूल्य नलिन निर्देशन दिएको छ।

खाद्य प्रविधि तथा गुण नियन्त्रण कार्यालयले उपभोक्ताको स्वास्थ्य संरक्षणलाई प्राथमिकतामा राख्दै बजार अनुगमनलाई नियमित र प्रभावकारी रूपमा निरन्तर सञ्चालन गरिने जनाएको छ।