महोत्तरीमा डकैतीको आतंकः प्रतिवाद गर्दा दम्पतीमाथि गोली प्रहार

धनुषा/जेठ २० गते। महोत्तरीको सोनमा गाउँपालिका–३ खखनामा गएराति भएको डकैती घटनामा एक दम्पती गोली लागेर घाइते भएका छन् । प्रहरीका अनुसार मंगलबार राति ५–६ जनाको समूहमा आएका डाँकाहरू घरभित्र प्रवेश गरेका थिए । प्रतिवाद गर्ने क्रममा उनीहरूले गोली चलाउँदा २७ वर्षीय ईश्वरनारायण यादव र उनकी २२ वर्षीया श्रीमती किरण यादव घाइते भएका हुन् ।

गोली लागेर किरणको घुँडामा तथा ईश्वरनारायणको काँध र छातीको बीच भागमा चोट लागेको बताइएको छ । घाइते ईश्वरनारायणका अनुसार डकैतहरूले राति सुतिरहेको अवस्थामा घरमा प्रवेश गरी आँखामा पट्टी बाँधेका थिए । त्यसपछि निर्घात कुटपिट गर्दै गोली प्रहार गरिएको उनले बताएका छन् ।

जिल्ला प्रहरी कार्यालय महोत्तरीका प्रहरी उपरीक्षक श्यामकुमार सारु मगरले डकैतहरूसँगको प्रतिवादका क्रममा दम्पती घाइते भएको जानकारी दिएका छन् । उनका अनुसार घाइतेहरूसँग प्रारम्भिक बयान लिइसकिएको छ भने घटनाबारे अनुसन्धान अघि बढाइएको छ । घाइते दुवैलाई प्रारम्भिक उपचारपछि थप उपचारका लागि जानकी हेल्थ केयरमा भर्ना गरिएको प्रहरीले जनाएको छ ।

घटनास्थल नजिकै रघुनाथ प्रहरी चौकी, सम्सी प्रहरी चौकी तथा सशस्त्र प्रहरीको क्याम्प रहे पनि डकैती भएको घटनाले स्थानीयवासी आक्रोशित बनेका छन् । प्रहरीले घटनास्थलबाट एक थान गोलीको खोका बरामद गरेको जनाएको छ । घटनामा संलग्न व्यक्तिहरूको खोजी कार्य जारी रहेको प्रहरीले बताएको छ ।