धनुषा/जेठ ९ गते । मधेसका सभामुख रामअशिष यादवले पछिल्लो समय पत्रकारिताप्रति समाजमा बढ्दै गएको अविश्वासबारे सञ्चार क्षेत्रभित्रै गम्भीर समीक्षा हुनुपर्ने बताएका छन् ।
नेपाल पत्रकार महासंघ महोत्तरी शाखाको १२औँ साधारण सभालाई सम्बोधन गर्दै सभामुख यादवले पत्रकारिताको विश्वसनीयता कमजोर बन्दै गएको संकेत देखिएकाले त्यसका कारण र समाधानबारे सञ्चारकर्मी स्वयंले खुला छलफल गर्नुपर्ने बताए । उनले पत्रकारहरूप्रति अविश्वासको वातावरण किन निर्माण भइरहेको छ भन्ने विषयमा आत्ममूल्यांकन आवश्यक रहेको उल्लेख गरे ।
उनले पत्रकारिता कुनै पनि सत्ता वा राजनीतिक शक्तिको पक्षमा सीमित हुन नहुने धारणा राख्दै सञ्चारकर्मीले स्वतन्त्र र आफ्नै व्यावसायिक मूल्यअनुसार अघि बढ्नुपर्ने बताए ।
संविधानको सन्दर्भ जोड्दै यादवले संघीयता, समानता, समावेशिता र सामाजिक न्याय नेपालको लोकतान्त्रिक व्यवस्थाका मुख्य आधार रहेको बताए । उनका अनुसार संविधानले परिकल्पना गरेका यी मूल्यमान्यता कमजोर भए लोकतन्त्र नै प्रभावित हुने अवस्था सिर्जना हुन सक्छ ।
सामाजिक न्याय र जनअधिकारका विषय उठाउने सञ्चारमाध्यममाथि राज्यले कुनै प्रकारको अंकुश लगाउन नहुने पनि उनले बताए । नेपाल पत्रकार महासंघ महोत्तरीका अध्यक्ष महेश दासको अध्यक्षतामा भएको कार्यक्रममा हरिप्रसाद मण्डल, इन्द्रदेव यादव, दशरथ भण्डारी लगायत विभिन्न संघसंस्थाका प्रतिनिधिहरूको उपस्थिति रहेको थियो ।
Discussion about this post