विवाह पञ्चमी महोत्सव अन्तर्गतको पाँचौँ दिन मटकोर विधि सम्पन्न

जनकपुरधाम/मङ्सिर ८ गते। सीता-राम विवाहपञ्चमी महोत्सवअन्तर्गत पाँचौँ दिन आज (सोमबार) मटकोर विधि सम्पन्न भएको छ । आज जनकपुरधाम स्थित गंगासागर पोखरीमा मटकोर विधि सम्पन्न भएको हो ।

जानकी मन्दिरको प्राङ्गणबाट बाजागाजा सहित बिहेको वेदी बनाउन माटो ल्याउन छोटे महन्थ राम रोशन दासको नेतृत्वमा साधु सन्त, प्रतिकात्मक जानकी सहितको टोली गंगासागर पोखरीमा पुगेको थिए । सो अवसरमा मैथली महिलाहरूले विभिन्न प्रकारका वैवाहिक गीत प्रस्तुत गरेका थिए। मटकोर विधिको क्रममा लगिएको माटोबाट सीता-राम विवाहका लागि मडवा निर्माण गरिने छ । पोखरीबाट जानकी मन्दिर भित्र्याइएको माटोले सीता(राम विवाहका लागि वेदी तयार गर्ने चलन छ ।

जानकी माताको मटकोर विधि हेर्नका लागि हजारौँको संख्यामा श्रद्धालु भक्तजन गंगासागरको डिलमा पुगेका थिए। वैवाहिक कार्यक्रममा सहभागी हुन अयोध्याबाट आएका जन्तीको समेत मटकोरमा सहभागिता थियो।

सप्ताहव्यापी कार्यक्रम विवाह पञ्चमी महोत्सव अन्तर्गत पहिलो दिन नगर दर्शन, दोस्रो दिन फूलबारी लीला, तेस्रो दिन धनुष यज्ञ, चौथो दिन तिलकोत्सव र आज मटकोर विधि सम्पन्न भएको छ ।

महोत्सवको छैटौँ दिन भोलि (मंगलबार) स्वयम्वर एवं वैवाहिक कार्यक्रम र अन्तिम दिन बुधबार राम कलेवा विधिसँगै विवाह पञ्चमी महोत्सव सम्पन्न हुनेछ ।