कार्यसम्पादन मूल्यांकनमा चार वर्षदेखि स्वास्थ्य कार्यालय पर्सा उत्कृष्ट

जनकपुरधाम। मधेस प्रदेशको स्वास्थ्य सेवा क्षेत्र सुधारमा पर्सा फेरि एकपटक शीर्षस्थ भएको छ। स्वास्थ्य तथा जनसंख्या मन्त्रालयले सार्वजनिक गरेको आर्थिक वर्ष २०८१/८२ को कार्यसम्पादन मूल्यांकनमा स्वास्थ्य कार्यालय पर्सा ८७ अंकका साथ पहिलो स्थानमा कायम रह्यो। पर्साले यसअघि पनि २०७८/७९ देखि लगातार उत्कृष्ट प्रदर्शन गर्दै चार वर्षसम्म ‘प्रथम’ स्थान जोगाइरहेको छ।

यो वर्षको मूल्यांकनमा स्वास्थ्य कार्यालय सर्लाही दोस्रो र महोत्तरी तेस्रो रहे। मन्त्रालयले प्रदेशभरका ८ स्वास्थ्य कार्यालय, ११ प्रदेशस्तरीय अस्पताल तथा एक स्वास्थ्य विज्ञान प्रतिष्ठानको समग्र कार्यसम्पादनको आधारमा मूल्यांकन गरेको हो। सेवा प्रवाह, योजनाको कार्यान्वयन, सेवाग्राही सन्तुष्टि र स्वास्थ्य सूचक सुधारजस्ता मापदण्डका आधारमा मन्त्रालयस्तरीय समिति गठन गरेर मूल्यांकन सम्पन्न गरिएको थियो।

जनकपुरमा आइतबार आयोजित वार्षिक समीक्षा गोष्ठीमा मधेस प्रदेशका मुख्यमन्त्री सरोजकुमार यादवले पर्साका निमित्त प्रमुख विनोद झालाई प्रमाणपत्रसहित सम्मान गरेका थिए। निरन्तर उत्कृष्टताको पृष्ठभूमि बारे जनस्वास्थ्य अधिकृत जयमोद ठाकुर भन्छन्, “लगातार चार वर्षसम्म अव्वल हुनु सहज होइन। टिमवर्क, सेवाको गुणस्तर र जनतासँगको भरोसाले पर्सालाई शीर्षमा पुर्‍याएको हो।”

स्वास्थ्य मन्त्रालयका अनुसार निरन्तर उपलब्धिका कारण पर्सा प्रदेशस्तरमै ‘मोडेल स्वास्थ्य कार्यालय’ का रूपमा स्थापित बन्दै गएको छ। सेवाग्राही सन्तुष्टि उच्च हुनु, योजनागत कार्यान्वयन प्रभावकारी हुनु र स्वास्थ्य सूचकमा निरन्तर सुधार नै पर्साको प्रमुख आधार मानिएको छ।