प्रदेशको मातहतमा प्रहरी नहुँदा चाहेअनुसार काम गर्न सकिएनः मुख्यमन्त्री सिंह

साउन ३० गते। मधेस प्रदेशका मुख्यमन्त्री सतिशकुमार सिंहले प्रदेशको मातहतमा प्रहरी नहुदा चाहेअनुसारको काम गर्न नसकेको बताएका छन्।

शुक्रबार मधेस प्रदेश प्रहरी कार्यालय, जनकपुरधामको भवन उद्घाटन कार्यक्रममा बोल्दै मुख्यमन्त्री सिंहले प्रदेशको सीमा भारतसँग जोडिएको र प्रदेशको मातहतमा प्रहरी नहुँदा समस्या भइरहेको बताए।

‘प्रहरी समायोजन भएर आए हामीलाई काम गर्न सजिलो हुन्छ। संघीयता आएपछि हामीले सबैभन्दा बढी बजेट खर्च गरेका छौँ। हामीले गत आवमा राजश्व पनि अहिलेसम्मकै सबैभन्दा बढी राजश्व संकलन भएको छ। तर प्रहरी नहुँदा हामीले धेरै काम व्यवस्थित रुपमा गर्न सकेको छैनौँ,’ उनले भने।

मुख्यमन्त्री सिंहले प्रदेश संकटग्रस्त क्षेत्र घोषणा भएकोमा प्रधानमन्त्रीलाई आजको कार्यक्रममा प्याकेजको घोषणा गर्न आग्रह गरे।

मुख्यमन्त्री सिंहले चुरे क्षेत्रको सानो–सानो खोलामा ड्याम बनाएर पानी जम्मा गर्न सकिए मधेसमा पानीको समस्या समाधान हुने बताए।

उनले आफू केही दिनअघि सुनकोशी कमला मरिन डाइभर्सनको अनुगमन गरेको भन्दै उक्त आयोजनाको काम द्रुत गतिमा गर्न आग्रह गरे। उनले भविष्यमा प्रहरी समायोजन भएपछि मधेस प्रदेशका प्रहरी अट्ने गरी भवन निर्माण गरिएको बताए।