गिरिजानन्द साह/जनकपुरधाम/असार १३ गते। युवाहरूलाई सामाजिक सेवामा संलग्न गराउँदै नेतृत्व विकासमा योगदान पुर्याउँदै आएको रोट्रयाक्ट क्लब अफ जनकपुरधाम र इन्ट्रयाक्ट क्लब अफ जनकपुरधामको संयुक्त तेस्रो साधारण सभा जनकपुरधाममा सम्पन्न भएको छ।
रोट्रयाक्ट क्लब अफ जनकपुरधामका अध्यक्ष आयुष कर्णको अध्यक्षतामा सम्पन्न सो सभामा दुवै क्लबका पदाधिकारी, सदस्य तथा आमन्त्रित पाहुनाहरूको उल्लेख्य उपस्थिति रहेको थियो।
सभामा अबका दिनमा सञ्चालन गरिने कार्यक्रमहरुमा दुवै क्लबबीच सहकार्य गर्दै प्रभावकारी ढंगले सामाजिक सेवा, स्वास्थ्य, शिक्षा, सरसफाइ, वातावरण संरक्षण तथा युवा सशक्तिकरणसँग सम्बन्धित विविध कार्यक्रम सञ्चालन गर्ने निर्णय गरिएको छ।
यसबाहेक, क्लबको सदस्यता शुल्क सम्बन्धी विषयमा पनि गहन छलफल गरिएको थियो। सदस्यता शुल्कको संरचना, भुक्तानी प्रक्रिया, पारदर्शिता तथा सदस्यहरूको सक्रिय सहभागितालाई अझ सुनिश्चित गर्ने विषयमा विचार–विमर्श गरिएको अध्यक्ष कर्णले जानकारी दिए।
सभामा क्लबका सचिवद्वयले आ–आफ्नो वार्षिक प्रतिवेदन प्रस्तुत गरेका थिए। कार्यक्रमको दौरान सदस्यहरूले विगत वर्षमा भएका गतिविधिहरुको समीक्षा गर्दै आगामी वर्षको लागि स्पष्ट योजना र कार्यदिशा तय गर्नेमा जोड दिए।
कार्यक्रममा सहभागी वक्ताहरूले क्लबको निरन्तर सक्रियता र युवाहरूद्वारा सञ्चालित सामाजिक कार्यको प्रशंसा गर्दै यस्ता साझा पहलले समुदायमा सकारात्मक परिवर्तन ल्याउन सक्ने विश्वास व्यक्त गरे।
साधारण सभाको अन्त्यमा अध्यक्ष आयुष कर्णले सबै सहभागीहरूलाई धन्यवाद ज्ञापन गर्दै आगामी दिनमा अझ व्यापक सहभागिता र सेवा भावका साथ अगाडि बढ्ने प्रतिबद्धता व्यक्त गरे।
उक्त सभा रोटरी मूलधारमा आबद्ध दुवै क्लबका युवाहरूबीच सहकार्यको उत्कृष्ट उदाहरणको रूपमा लिइएको छ।
Discussion about this post