आ.व. २०८२/०८३ को लागि मटिहानी नगरपालिकाले ल्यायो ४४ करोड ५० लाखको बजेट

महोत्तारी/असार ४ गते। महोत्तरीको मटिहानी नगरपालिकाका नगर प्रमुख हरिप्रसाद मण्डलले आर्थिक वर्ष २०८२/०८३ को निति तथा कार्यक्रम प्रस्तुत गरेका छन् ।

मटिहानी नगरपालिकाको १५ औँ नगरसभाको खुला सत्रमा निति तथा क्रार्यक्रमसँगै आव २०८२/०८३ को लागि कुल बजेट ४४ करोड ५० लाख बनियोजन गरिएको छ। जसमा राजश्व बाँडफाँड तर्फको १० करोड ५ लाख, स‌घीय सरकारको तर्फको २८ करोड १० लाख, प्रदेश सरकारको १ करोड २६ लाख र आन्तरिक श्रोतबाट जम्मा ५ करोड ९० लाख गरी कुल ४४ करोड ५० लाख को बजेट नगरप्रमुख मण्डलले प्रस्तुत गरेका छन्। नीति तथा कार्यक्रम र बजेटको उद्घाटन सत्रमा मेयर मण्डलले प्रस्तावित गरेको बजेटमाथि सभामा छलफल भई बजेट पारित हुनेछ। मेयर मण्डलको अध्यक्षतामा सम्पन्न उद्घाटन सत्रमा उहाँले नीति, कार्यक्रम तथा बजेटमा कृषि, शिक्षा र स्वास्थ्यलाई प्रमुखता दिँदै यस आर्थिक वर्षमा यी तीनै महत्वपूर्ण विषयका साथै मटिहानीको धार्मिक, ऐतिहासिक र पर्यटकीय विकासको क्षेत्रमा समेत उल्लेख्य सकारात्मक कदम उठाउने बताएका छन् ।

उनले मटिहानीको मुख्य पहिचान नै मटिहानीको विकासको मूल आधार भएकाले विगतका वर्षहरूमा मटिहानीको धार्मिक, ऐतिहासिक र पर्यटकीयका साथै पहिचानका लागि विकासका मूल फुटाउने बताए । मधेस प्रदेशका सभामुख रामचन्द्र मण्डलको प्रमुख आतिथ्यमा सम्पन्न भएको सो नगरसभाबाट मेयर मण्डलले केही महत्वाकांक्षी योजनासमेत सार्वजनिक गरेका छन्। उनले कृषि तथा पशुपालनको क्षेत्रमा थप योजनाहरूसहित यस क्षेत्रको विकासमा निरन्तरता, व्यावसायिक खेती र पशुपालनमा युवाको सहभागिता लगायतमा काम गर्ने बताए ।

त्यस्तै, उद्योग वाणिज्यतर्फ विभिन्न तालिम तथा व्यवसाय सञ्चालनमा नगरपालिकाले सहयोगी भूमिका निर्वाह गर्ने उनल थपे । यता पर्यटनमा विकासका लागि मटिहानी मठलाई विश्व सम्पदा सूचीमा राख्न सरकारलाई अनुरोध गर्ने तथा मटिहानीभित्रका विभिन्न पोखरी, जलसागर, गोसाइँकुण्ड आदिको सौन्दर्यीकरणमा जोड दिने बताए। आन्तरिक तथा बाह्य पर्यटकीय स्थलहरुको प्रबर्द्धनका लागि नगरपालिकाका कर्मचारीहरुलाई आर्थिक सुविधा सहित १० दिनको पर्यटन काज दिने व्यवस्था मिलाइने बताइएकोछ। मटिहानी नगरपालिकामा आन्तरिक तथा बाह्य पर्यटकलाई बढावा दिन नगरभित्रका मठ मन्दिर तथा मस्जिदहरूलाई पर्यटकीय स्थलको रूपमा विकास गर्न प्रचारप्रसार, वृत्तचित्र निर्माणलगायत थप संस्कृति झल्काउने भौतिक पूर्वाधारहरू विकास गरिने बताए ।

त्यस्तै, शिक्षाको क्षेत्रमा मैथिली भाषाको विकास, संरक्षण तथा संवर्द्धन गर्न नगरभित्रका सामुदायिक विद्यालयको कक्षा एकदेखि आठसम्मको पाठ्यक्रममा सय अंकको मैथिली भाषा समावेश गरी अध्ययन गराइने व्यवस्था मिलाइने बताए।

त्यस्तै, विद्यार्थीको सूचना प्रविधिमा पहुँच पुर्‍याउन जोडकोषमा आधारित ल्यापटप वितरण, कक्षा ११ मा अध्ययनरत छात्राहरूलाई नि:शुल्क साइकल वितरण , दलित, विपन्न, गरिब, अपांग, असहाय तथा सहिद परिवारका जेहेनदार विद्यार्थीलाई नगरप्रमुख छात्रवृत्ति पुरस्कार सहयोगको व्यवस्था गरिने नगरप्रमुखले नीति, कार्यक्रम तथा बजेटमा उल्लेख गरिएको छ।

त्यस्तै, नगरक्षेत्रभित्रका सबै सामुदायिक विद्यालयमा फ्री बुक एन्ड ब्याग डे कार्यक्रम सञ्चालन गरी विद्यार्थीको मनोबल उच्च बढाउनुको साथै सीप विकासमा जोड दिने उल्लेख गरिएको छ।

यता स्वास्थ्यतर्फ मटिहानी नगरपालिकाले बर्थिङ सेन्टरले रेफर गरेको खण्डमा जनकपुरसम्मका लागि निःशुल्क एम्बुलेन्स सेवा प्रदान गरिनेछ। गर्भवतीका लागि अल्ट्रासाउन्ड निःशुल्क गरिनुका साथै आयुर्वेद तथा पारम्परिक चिकित्सा प्रणालीको विकास गरिने उल्लेख छ।
यसका अलावा समावेशीकरण/गरिबी निवारण तथा कला, संस्कृति, खेलकुद, पूर्वाधार विकास, सिँचाइ, भवन तथा सहरी विकास, सञ्चार, वातावरण तथा विपत् व्यवस्थापनसम्बन्धी नीति तथा कार्यक्रम, संस्थागत विकास तथा सुशासनसम्बन्धी नीति तथा कार्यक्रम लगायतमा आवश्यक बजेट तथा योजनाहरू सञ्चालन गरिने मेयर मण्डलले उल्लेख गरेका छन् ।