मिथिला क्षेत्रमा चौरचन पर्व धुमधामका साथ मनाइयो

जनकपुरधाम/भदौ २९ गते। मिथिला क्षेत्रमा मनाइने महत्वपूर्ण सांस्कृतिक पर्व चौरचन (चौठ चन्द्र) आज श्रद्धा र उल्लासका साथ मनाइएको छ।

भाद्र शुक्ल चतुर्थीका दिन मनाइने यस पर्वमा साँझपख विशेष विधिपूर्वक चन्द्रमाको पूजा गर्दै अर्घ्य दिइएको हो। पर्वका अवसरमा घरआँगनमा विभिन्न परिकार, फलफूल तथा पूजाका सामग्री सजाएर चन्द्रमाको पूजा गरिएको छ।

चौरचन पर्वमा विशेषगरी दही, चिउरा, केरा, स्याउ, नरिवल, उखु, मिठाईलगायतका विभिन्न फलफूल तथा पकवान चढाउने परम्परा रहेको छ। परिवारको परम्परा र स्थानीय चलनअनुसार पूजामा प्रयोग हुने सामग्रीमा केही भिन्नता पनि देखिन्छ।

मिथिला संस्कृतिमा विशेष महत्व बोकेको चौरचन पर्वलाई पारिवारिक सुख, शान्ति, समृद्धि, सुस्वास्थ्य तथा कल्याणसँग जोडेर मनाउने गरिन्छ। पर्वका लागि महिला तथा परिवारका सदस्यहरू दिनभर पूजाका सामग्री र चढाबा तयार पार्न व्यस्त भएका थिए।

साँझ चन्द्रदर्शन भएपछि परिवारका सदस्यहरू भेला भएर विधिपूर्वक चन्द्रमाको पूजा तथा अर्घ्य अर्पण गरेका छन्। चौरचन पर्वले मिथिलाको मौलिक संस्कृति, परम्परा र पारिवारिक एकतालाई समेत झल्काउने गर्दछ।

नेपालको मधेस प्रदेशका विभिन्न जिल्लाका साथै भारतको बिहारलगायत मिथिला क्षेत्रमा पनि चौरचन पर्व श्रद्धा, आस्था र हर्षोल्लासका साथ मनाइएको छ।