गिरिजानन्द साह/जनकपुरधाम/जेठ २२ गते। युवामा उद्यमशीलताको भावना विकास गर्न र रोजगारीको अवसर सिर्जना गर्ने लक्ष्य राख्दै राष्ट्रिय युवा परिषद्ले मधेस प्रदेशको राजधानी जनकपुरधाममा मधेस प्रदेशस्तरीय युवा उद्यमशीलता प्रवर्द्धन सम्मेलन सम्पन्न गरेको छ।
‘युवाका लागि अबको निकास: उद्यमशीलता, रोजगारी र सिप विकास’ भन्ने मूल नाराका साथ आयोजित सम्मेलनमा मधेस प्रदेशभरिका नवउद्यमी र उद्यमशीलता क्षेत्रमा भविष्य देखिरहेका १६ देखि ४० वर्ष उमेर समूहका युवाहरूको उल्लेखनीय सहभागिता रह्यो।
राष्ट्रिय युवा परिषद्का कार्यकारी उपाध्यक्ष सुरेन्द्र बस्नेतका अनुसार सम्मेलनमा सातै प्रदेशमा युवा उद्यमशीलतालाई प्रवर्द्धन गर्ने उद्देश्यसहित नीति निर्माणदेखि कार्यान्वयन तहका जिम्मेवार व्यक्तिहरू, सरकारी तथा निजी क्षेत्रका प्रतिनिधिहरू, उद्योग, वाणिज्य, बैंक तथा वित्त क्षेत्रका विज्ञहरूका प्रस्तुति र प्यानल छलफल समावेश गरिएको थियो।
सम्मेलनको उद्घाटन समारोहमा युवा तथा खेलकुद मन्त्री तेजुलाल चौधरीले सम्बोधन गर्दै सरकारले आगामी आर्थिक वर्षको बजेटमा युवा स्टार्टअप र उद्यमशीलता प्रवर्द्धनलाई उच्च प्राथमिकतामा राखेको जानकारी दिए। उनले सिप विकास, नवप्रवर्तन र रोजगारी सिर्जनामार्फत युवालाई आत्मनिर्भर बनाउने लक्ष्य तय गरिएको बताए।
सम्मेलनमा मधेस प्रदेशका खेलकुद तथा समाज कल्याण मन्त्री प्रमोद कुमार जयसबाल, मधेस प्रदेशका श्रम तथा यातायात मन्त्री कौशल किशोर राय, राष्ट्रिय वाणिज्य बैंकका कोशी प्रदेश को प्रमुख प्रवन्धक रिसब भट्टराई, नेपाल स्काउटका प्रमुख आयुक्त देवराज घिमिरे, नीति तथा योजना आयोगकी सदस्य ललिता कुमारी यादव, प्रशिक्षक राम थापा क्षेत्रीलगायतको विशेष उपस्थिति रहेको थियो।
कार्यक्रममा सहभागी युवाहरूमाझ उद्यमशीलता प्रवर्द्धनका अवसर, चुनौती र समाधानमाथि खुला छलफल, अन्तरक्रिया तथा अभिमुखीकरण कार्यक्रम सञ्चालन गरिएको थियो। सम्मेलनले उद्यमशीलताको क्षेत्रमा युवालाई मार्गदर्शन मात्र नभई प्रेरणा पनि दिने विश्वास आयोजकले व्यक्त गरेका छन्।
Discussion about this post