दुधमति नदी उत्खन्न र विकास कार्य अघि बढाउन समितिहरू गठन गर्ने निर्णय

धनुषा/बैशाख ३१ गते। धनुषा र महाेतरी जिल्ला जाेडने धार्मिक महत्व बाेकेका दुधमति नदीकाे संरक्षण एवं साैन्दर्यकरण अन्तर्गत उत्खनन् तथा विकास कार्य तिव्रगति अघि बढाउन थालिएकाे छ ।

मधेश प्रदेश सरकारकाे उर्जा, सिचाई तथा खानेपानी मन्त्री शेषनारायण यादवकाे प्रयासमा प्रदेश सरकारकाे गाैरवकाे आयाेजनाकाे रूपमा दूधमति उत्खनन् तथा विकास आयाेजनालाई अघि बढाइएकाे हाे ।

कार्यविधि पारित भई नाक्सांकन, सिमांकनकाे काम सम्पन्न भई डिपिआर तयारी अन्तिम चरणमा रहेकाे छ । अझ तिव्रगतिमा काम अघि बढाउन र व्यवस्थापन तथा प्रचार प्रसारका लागि विभिन्न समितिहरू गठन प्रक्रिया अघि बढाइएकाे छ ।

बुधवार दुधमति नदी उत्खनन् तथा विकास कार्य उपसमितिकाे बसेकाे बैठकबाट नदी उत्खनन् तथा विकास कार्य व्यवस्थापनकाे कार्य तिव्रगतिमा अघि बढाउन विभिन्न समितिहरू गठन गरिने निर्णय गरिएकाे हाे ।

आयोजनालाई प्रभावकारी रुपमा संचालन तथा व्यवस्थापन तथा प्रचार प्रसारका लागि दुधमति नदी उत्खन्न तथा विकास कार्यविधि, २०८१ को दफा ७ (ख) बमोजिम व्यवस्थापन समिति, प्राविधिक समिति र प्रचार प्रसार समिति गठन गर्ने निर्णय गरिएकाे जनाइएकाे छ ।

साे समितिहरूले आयोजना कार्यान्वयनको क्रममा देखा पर्न सक्ने संभावित प्राविधिक जोखिम, जटिलता र कठिनाईलाई समयमा नै पत्ता लगाई समाधानका लागि आवश्यक सुझाव उपसमितिलाई सिफारिश गर्ने एवम् दुधमती नदीको ऐतिहासिक, पुरातात्विक, धार्मिक महत्वलाई प्रचार प्रसार गरी आकर्षक पर्यटकीय गन्तव्यको रुपमा देश र विदेशमा प्रचार प्रसार उर्जा, सिंचाइ तथा खानेपानी मन्त्रालय मातहत रहेर गर्नेछ ।

समितिका पदाधिकारीहरुको नियुक्ति, कार्यक्षेत्रगत शर्त एवम् पारिश्रमिक सम्बन्धी आवश्यक कुरा सम्बन्धमा उपसमितिकाे आगामी बस्ने बैठकबाट निर्णय गरिने निर्णय गरिएकाे उपसमितिका संयाेजक समेत रहेका ऊर्जा, सिचाई तथा खानेपानी मन्त्री शेषनारायण यादवले जानकारी दिएका छन् ।

दुधमती नदी उत्खन्न तथा विकास आयोजनालाई नतिजामूखी एवम् निर्धारित समयमा सम्पन्न गर्न, नियमित प्रशासकीय, प्राविधिक तथा व्यवस्थापकीय कार्यहरु गर्नका लागि आयोजनाको उदगम् स्थल नजिक पायक पर्ने स्थानमा आयोजनाको नामबाट कार्यालय स्थापना गर्न मन्त्रालय समक्ष सिफारिश गर्ने निर्णय समेत गरिएकाे छ ।

दुधमती नदी उत्खन्न तथा विकास आयोजनालाई निर्धारित समयमा सम्पन्न गर्न स्वीकृत बहुवर्षीय आयोजनाको लागत अनुमान बमोजिम आवश्यक बजेट प्राथमिकताका साथ अगामी वर्ष २०८२/०८३ को वार्षिक नीति तथा कार्यक्रम तथा बजेटमा समावेश गराउने निर्णय पनि गरिएकाे मन्त्री यादवले जानकारी दिएका छन् ।

साे बैठकमा उपसमितिका सदस्य समेत रहेका धनुषा महाेतरीका सशस्त्र र नेपाल प्रहरीका प्रहरी नायब निरिक्षक, मालपाेत कार्यालय धनुषाका प्रमुख, धनुषाका सहायक प्रमुख जिल्ला अधिकारी क्षिरेश्वरनाथ नगरपालिकाका मेयर सुखदेव यादव, उपमेयर रचना माथेमा, लक्ष्मिनिया गाउंपालिकाका उपमेयर फुलकुमारी र सम्बन्धित पालिकाका वडाध्यक्षहरूकाे उपस्थिति रहेकाे थियाे ।