बैशाख १५ गते। ‘सङ्घीयतामा पूर्वाधार विकासको महत्त्व, सम्भावना र चुनौती तथा अन्तरप्रदेशीय एकता र भिन्नता’ विषयक अन्तरक्रिया कार्यक्रम महोत्तरीको बर्दिबासमा सम्पन्न भएको छ। मधेस प्रदेश सरकारको भौतिक पूर्वाधार विकास मन्त्रालयको आयोजनामा आयोजित कार्यक्रममा सातवटै प्रदेशका भौतिक पूर्वाधार विकासमन्त्रीहरूको सहभागिता रहेको थियो।
कार्यक्रमको उद्घाटन संघीय सरकारका भौतिक पूर्वाधार विकास मन्त्री देवेन्द्र दाहाल, मधेस प्रदेशका मुख्यमन्त्री सतिशकुमार सिंह तथा भौतिक पूर्वाधार विकास मन्त्री सरोजकुमार यादवले संयुक्त रूपमा गरे। कार्यक्रममा सातवटै प्रदेशका सचिवहरू पनि सहभागी भएका थिए, जसले आ–आफ्ना प्रदेशका योजना तथा कार्यक्रमहरूको दस्तावेज प्रस्तुत गरे।
अन्तरक्रियामा मन्त्रीहरूले आ–आफ्ना प्रदेशमा भौतिक पूर्वाधार विकासका अभ्यास, सम्भावना र चुनौतीबारे अनुभव आदान–प्रदान गरे। साथै एक प्रदेशले अर्को प्रदेशसँग के–कसरी सहयोग गर्न सकिन्छ भन्ने विषयमा गहन छलफल गरिएको थियो।
मन्त्रीहरूले यस्तो कार्यक्रमले प्रदेश सरकारहरूलाई एकआपसमा जोड्ने, आपसी समन्वय सुदृढ गर्ने र भौतिक पूर्वाधार विकासका कार्यहरू थप प्रभावकारी बनाउने वातावरण तयार गरेको विश्वास व्यक्त गरेका छन्।
कार्यक्रमले भविष्यमा प्रदेशहरूबीच आपसी सहकार्य र साझेदारीलाई थप मजबुत बनाउने अपेक्षा गरिएको छ।
Discussion about this post