महाकुम्भकी भाइरल गर्ल मोनालिसालाई फिल्म अफर गर्ने निर्देशक बलात्कारको आरोपमा पक्राउ

चैत १८ गते। भारतको महाकुम्भ मेलामा रुद्राक्ष माला बेच्न जाँदा भाइरल भएकी युवती मोनालिसालाई चलचित्रमा काम दिने भन्दै आश्वासन दिएका निर्देशक सनोज मिश्रालाई दिल्ली प्रहरीले पक्राउ गरेको छ। उनलाई बलात्कारको आरोपमा पक्राउ गरिएको हो। प्रहरीका अनुसार सनोज मिश्रमाथि एक युवतीलाई पटक-पटक बलात्कार गरेको आरोप लागेको छ। एउटा सानो सहरबाट आएकी ती युवती नायिका बन्ने सपना देखेर आएकी थिइन्।

सनोजले उनलाई फिल्ममा भूमिका दिने वाचा गरेर बोलाएका थिए। शारीरिक शोषण गरेको र कसैलाई भनेमा फिल्म उद्योगमा काम नपाउने धम्की सनोजले दिएको पीडित महिलाले बयानमा बताएकी छन्। यस विषयमा उजुरी परेपछि प्रहरीले अनुसन्धान सुरु गरी सनोजलाई पक्राउ गरेको हो। उनको गिरफ्तारीले मोनालिसाको छविमाथि पनि प्रश्न उठन थालेको छ।

दिल्ली उच्च अदालतले उनको जमानत निवेदन खारेज गरेपछि नबी करीम प्रहरीले उनलाई हिरासतमा लिएको थियो। सनोजले महाकुम्भ मेलामा माला बेच्ने मोनालिसालाई पनि आफ्नो फिल्म ‘द डायरी अफ मणिपुर’मा काम दिने प्रस्ताव गरेका थिए। प्रहरीले सनोजविरुद्ध पहिले पनि धेरै उजुरी परेको तर यसपटक भने प्रमाणको आधारमा कारबाही गरेको बताएको छ।