पहिलो प्रयासमै मधेशी चेली निकिता मिश्रले प्रहरी निरीक्षकमा नाम निकालेपछि

गत मङ्सिर ८ गते लोकसेवा आयोगले २०७८ सालमा नेपाल प्रहरी सेवा अन्तर्गतको प्रहरी निरीक्षक (इन्स्पेक्टर) पदमा लिएको परीक्षाको नतीजा प्रकाशित ग¥यो ।

१ सय ४६ जना उत्तीर्ण भएको नामावली भित्र मधेशी चेली निकिता मिश्रको पनि नाम थियो । त्यो दिन निकिता काठमाडौंकै गल्र्स होस्टेलमा थिइन् । साँझको समयमा नतीजा प्रकाशित हुँदा साथीहरूले उनलाई शुभकामना र बधाई दिन थाले । नतीजा आउने दिन दिउँसोदेखि नै नर्भस भएकी निकिता साँझको समयमा साथीहरूले ख्यालठट्टा गरेको भनेर रिसाइन् पनि । पुनः एकजना साथीले लोकसेवा आयोगको नतीजाको प्रतिलिपिको स्क्रिनसट उनको म्यासेन्जरमा पठाउँदा मात्र उनी विश्वस्त भइन् ।

पछि लोकसेवा आयोगको वेबसाइटमा नतीजा हेरेपछि निकिताले जोडले चिच्याउँदै खुशी साटासाट गरिन् । वीरगञ्ज महानगरपालिका वडा नम्बर १४ स्थित चिनीमिल आवास क्षेत्रमा बसोबास गर्ने निकिताले आमासँग भिडियो कलमा खुशीको खबर सुनाउँदा आमा खुशीले छोरीसँगै भिडियो कलमा रुन थालिन् । धेरै सङ्घर्षपछि २३ वर्षीया मिश्रले प्रहरी निरीक्षकमा एकैचोटि सफलता हासिल गरेपछि अहिले वीरगञ्ज, रौतहट र काठमाडौंमा समेत उनको चर्चा चलेको छ ।

सामाजिक सञ्जाल फेसबूकमा निकिता मिश्रको वाल शुभकामनाले भरिएको छ । रौतहटको बलुवा मदनपुर गाउँपालिका स्थायी घर भएकी निकिताको परिवार अहिले वीरगञ्जस्थित चिनीआवास क्षेत्रमा बस्छ । निकिताका बुबा वीरगञ्जकै सिद्धार्थ माविमा कार्यरत छन् ।

सिद्धार्थ माविबाट स्कूले अध्ययन गरेकी निकिताले ठाकुर राम बहुमुखी क्याम्पसबाट बिएस्सी उत्तीर्ण गरिन् भने हाल त्यहि क्याम्पसमा राजनीतिशास्त्रमा स्नातकोत्तर गर्दैछिन् । स्नातक सकेर जिएचपी स्कूल वीरगञ्जमा चार वर्षसम्म लेखापालमा जागीर गरेकी निकिताले आफूलाई साहसी महिला प्रमाणित गरेकी छन् ।

चार वर्षअघि प्लस टु सकेर सुब्बाको लिखित परीक्षा उत्तीर्ण भएतापनि अधिकृतस्तरको जागीर खान्छु भन्ने सोचले गर्दा उनी अन्तर्वार्ता दिन नै गइनन् । त्यसपछि स्नातक सकाएर काठमाडौंको कोलम्बिया इन्स्ट्च्युटबाट प्रहरी निरीक्षक पदको तयारी गरेकी निकिता पहिलो प्रयासमैं सफल हुँदा निकै खुशी छिन् ।

मङ्सिर २४ गते (आज) देखि उनी १६ महीने तालीममा सहभागी भएकी छन् । मधेशका छोरीचेलीलाई राज्यका हरेक अङ्ग तथा तहतप्कामा जागीर खानको लागि समाजले प्रेरित गर्नुपर्ने उनको आग्रह छ ।

निकिता भन्छिन्, ‘पहाडी समुदायमा छोरीचेलीलाई स्वतन्त्र वातावरण दिइन्छ, तर मधेशका छोरीचेलीहरु रूढिवादी चिन्तन र सोचाइका कारण पछि पर्दै गर्दै गएका छन् । छोरीलाई विभेद नगरी छोरा सरह शिक्षादीक्षा, पालनपोषण, घुमफिर लगायतमा अभिभावकले ध्यान दिए घरपरिवार, समाज र देशको नाम उज्ज्वल गर्न सक्छन् ।’ 

विगतका दिनमा घुम्टो ओढेर बस्ने मधेशी समुदायका छोरीचेलीहरु अहिले विस्तारै परिवर्तनको बाटोतिर अग्रसर हुँदै गएको वीरगञ्ज युवा समाजका अध्यक्ष कमल चौगाईले बताए । अब अरु अभिभावकले पनि आफ्ना छोरीहरुलाई शिक्षा दिक्षा दिएर स्वतन्त्रता दिनुपर्ने चौगाईको भनाई छ । छोरीहरु पनि छोराभन्दा कम हुँदैनन् भन्ने कुरा निकिताले सावित गरेको पनि उनले बताए ।