कोरोना संक्रमणको जोखिम बढ्दै गएपछि धनुषाका थप तीन वटा स्थानीय तहमा लकडाउन

जनकपुरधाम । कोरोना संक्रमणको जोखिम बढ्दै गएपछि धनुषाका थप तीन वटा स्थानीय तहमा लकडाउन गरिएको छ । कमला, मिथिला र नगराइन नगरपालिकाले सोमबारदेखि लकडाउन लगाएको हो ।जनकपुरधाम उपमहानगरपालिकाले कोरोना संक्रमण रोकथाम तथा नियन्त्रणका लागि निषेधाज्ञालाई थप एक सातासम्म निरन्तरता दिने निर्णय गरेको एक दिन नबित्दै ती नगरपलिकारुले पनि कामकाज ठप्प पारेका हुन् ।

कोरोनाको संक्रमण समुदायस्तरमा समेत देखापर्न थालेकाले यसको जोखिम रोकथाम तथा न्यूनिकरण गर्न भन्दै कमला नगरपालिकाले सोमबारदेखि आगामी भदौ १ गतेसम्मका लागि अति आवश्यकबाहेकका सबै सेवा बन्द गरिएको जनाएको हो ।नगर प्रमुख रामउदगार गोइतले यस्तो असहज परिस्थितिमा लकडाउनको पालना गर्न सबैसँग आग्रह गरेका छन् ।

मिथिला नगरपालिकाले मंगलबारदेखि लागू हुने गरी भदौ २ गतेसम्मका लागि अति आवश्यकबाहेक सबै कामकाज बन्द गर्ने जनाएको छ । नगर प्रमु्ख हरिनारायण महताले कोरोना संक्रमण फैलिन थालेकाले कामकाज बन्द गरिएको बताएका छन् ।

नगराइन नगरपालिकाले सोमबारदेखि लागू हुने गरी साउन ३२ गतेसम्मका लागि लकडाउन लगाउने निर्णय गरेको नगर प्रमुख परमेश्वर यादवले बताएका छन् ।

यसअघि जिल्ला प्रशासन कार्यालय, धनुषाले जनकपुरधाम उप महानगरपालिकाका साथै क्षिरेश्वरनाथ नगरपालिकाको महेन्द्रनगर बजार क्षेत्रमा साउन ३२ गतेसम्मका लागि निषेधाज्ञा आदेश जारी गरिसकेको छ ।