सिरहाका १७ वटै पालिकाका मुसहर समुदायका किशोरीलाई व्यवसायोन्मुख गर्न साहस सक्रिय

लहान/असोज १५ गते।सिरहाको १७ वटै पालिकामा रहेका मुसहर समूदायका १५ देखि १८ बर्ष उमेरकी ९ सय ९६ किशोरीमा परिवर्तन देखिन थालेको छ ।

जीवन उपयोगी सीप र बितीय साक्षरताको कक्षामा समावेश भएर साना व्यवसायमा लागेर सयौ मुसहर किशोरी सामाजिक रुपान्तरणमा महत्वपूर्ण भूमिका निर्वाह गर्न थालेका छन् ।

व्यवसाय गर्न चाह्नेहरुलाई सिकाई केन्द्र संचालन गर्ने सहयोगी हातहरुको समूह(साहस नेपाल)ले आवश्यक समानहरु उपलब्ध गराउने गरेको परियोजनाका डा.मनोजकुमार श्रापले बताए । किशोरीहरु मध्ये धेरैले हाँस पालन, मोःमो चाउमिन खाजा पसल, किराना पसल, तरकारी पसल तथा अण्डा बिक्री केन्द्र संचालन गरिरहेकी छिन् ।

व्यवसाय संचालनका लागि किशोरीलाई थप व्यवसायिक तालिमहरु दिइएको छ । व्यवसाय संचालन गर्ने अधिकांश किशोरीहरुको बचत गर्ने खाता सहकारी संस्थाहरुमा खोलिएको छ । बित्तिय कारोबारमा जोडिएकी यी किशोरीहरु आफ्नो परिवारकी पहिलो ब्यक्ति हुन । अधिकांश मुसहर समूदाय बित्तीय कारोबार भन्दा बाहिर छन् अर्थात कुनै पनि बैंकमा उनीहरुको खाता छैन ।

सार्वजनिक जग्गामा छाप्रो बनाएर जीवनयापन गर्ने गर्ने यी समूदायलाई राज्यले अहिलेसम्म जग्गा उपलब्ध गराएको छैन । यस समूदायमा शिक्षाको अभाव टार्न र बालबिबाहको समस्या समाधान गर्न साना व्यवसायमा किशोरीहरुको सहभागिताले केही मद्दत पुगेको सहास नेपालका सिरहा संयोजक किशोर कर्णले बताए । उनले स्ट्रीट चाइल्ड अफ नेपालको साझेदारीमा मार्जिनलाइज्ड नो मोर परियोजना अन्तर्गत सिरहा जिल्लाभित्र रहेको १७ वटै पालिकामा सिकाई केन्द्र संचालनमा रहेको जानकारी दिए ।

मार्जिनलाइज्ड नो मोर परियोजना अन्तर्गत जिविको पार्जन कार्यक्रममा जिल्लाभरी १ सय १५ र ७ सय १२ किशोरीलाई व्यवसाय संचालन गर्न समाग्री बितरण गरिएको सहास नेपालकी गीता चौधरीले बताइन् । किशोरीहरुलाई सहास नेपालले व्यवसाय उन्मुख गराउँन सक्रिय छन् ।