इजरायल निर्वाचन सर्वेक्षण, ३० दल मैदानमा उत्रदा ‘हङ पार्लियामेन्ट’ को संकेत

काठमाडाैं/कार्तिक १० गते। इजरायलको निर्वाचनमा को-को प्रतिस्पर्धा गर्दैछन् र जनमत सर्वेक्षणहरूले के देखाएका छन् ? भन्नेमा विश्व ब्यापी चासाे रहेकाे छ  । मतदान केन्द्रहरू खुल्न अब केही समय मात्र बाँकी छ। आजको निर्वाचनमा प्रतिस्पर्धा गरिरहेका ३० भन्दा बढी राजनीतिक समूहहरूमध्ये मतदाताले कुनै एकको पक्षमा आफ्नो मत खसाल्नेछन्।

आगामी सरकारको नेतृत्व गर्न दुई मुख्य गठबन्धन (ब्लक) बीच कडा प्रतिस्पर्धा छ। पहिलो समूह ‘लिकुड’ पार्टीको नेतृत्वमा रहेको गठबन्धन हो, जसमा धेरै अति-दक्षिणपन्थी र कट्टर धार्मिक (अल्ट्रा-अर्थोडक्स) दलहरू सामेल छन्। दोस्रो समूह मुख्य विपक्षी गठबन्धन हो, जसमा यहुदी नेतृत्वका चार विपक्षी शक्तिहरू ‘याशार’ पार्टी, ‘डेमोक्र्याट्स’ , ‘यिस्रायल बेतेइनु’ पार्टी र ‘टुगेदर’ गठबन्धन समावेश रहेका छन्।

चुनावी मैदानमा धेरै दलहरू रहेकाले कुनै पनि एक दल वा समूहले सरकार गठनका लागि आवश्यक पर्ने ६१ सिटको स्पष्ट बहुमत प्राप्त गर्नु लगभग असम्भव देखिएको छ। शुक्रबार निर्वाचनसम्बन्धी प्रचारप्रसारमा रोक लाग्नुअघि गरिएका जनमत सर्वेक्षणहरूले कुनै पनि मुख्य समूहले बहुमत ल्याउन नसक्ने संकेत गरेका थिए। प्रमुख राजनीतिक दल तथा गठबन्धनहरूको विवरण यस प्रकार छ:

‘याशार’ : पूर्व सेना प्रमुख गादी आइसेनकोटको नेतृत्वमा रहेको। २२ देखि २४ सिट जित्ने अनुमान।

‘लिकुद’: इजरायलमा सबैभन्दा लामो समयसम्म प्रधानमन्त्री रहेका बेन्जामिन नेतान्याहुको नेतृत्वमा रहेको। २१ देखि २३ सिट जित्ने अनुमान।

‘टुगेदर’ : पूर्वप्रधानमन्त्रीद्वय नाफ्ताली बेनेट र याइर लापिडको नेतृत्वमा रहेको। १३ देखि १४ सिट जित्ने अनुमान।

‘डेमोक्र्याट्स’: याइर गोलानको नेतृत्वमा रहेको। ८ देखि ९ सिट जित्ने अनुमान।

‘जोइन्ट लिस्ट’ : अरब नेतृत्वका तीन दलहरू हादाश, बालाद र ताअल  मिलेर बनेको। ९ देखि १० सिट जित्ने अनुमान।

‘यिस्रायल बेइतेइनु’ : एभिग्डोर लिबरम्यानको नेतृत्वमा रहेको। ८ सिट जित्ने अनुमान।

‘युनाइटेड तोराह जुदाइज्म’ : यसमा दुई ठूला ‘अश्केनाजी हारेदी’ (Ashkenazi Haredi) दलहरू समावेश छन्। ८ सिट जित्ने अनुमान।

‘शास’: आर्य डेरीको नेतृत्वमा रहेको, जसले ‘सेफार्दिक हारेदिम’ (Sephardic Haredim) समुदायको प्रतिनिधित्व गर्छन्। ७ देखि ८ सिट जित्ने अनुमान।

‘ओत्ज्मा येहुदित’: अति-दक्षिणपन्थी राष्ट्रिय सुरक्षा मन्त्री इतामार बेन-ग्भिरको नेतृत्वमा रहेको। ७ देखि ८ सिट जित्ने अनुमान।

‘रिलिजियस जियोनिज्म-जेहुत’ : अति-दक्षिणपन्थी अर्थमन्त्री बेजालेल स्मोट्रिच र मोशे फेइग्लिनको नेतृत्वमा रहेको। ५ देखि ६ सिट जित्ने अनुमान।

‘राआम’ : मन्सुर अब्बासको नेतृत्वमा रहेको। ५ देखि ६ सिट जित्ने अनुमान।