कांग्रेस महाधिवेशनलाई लिएर धनुषामा देउवा पक्षको छुट्टै तयारी

असोज ११ गते । नेपाली कांग्रेसको १५औँ महाधिवेशनलाई लक्षित गर्दै पूर्वसभापति शेरबहादुर देउवा पक्षले धनुषामा संगठनात्मक गतिविधि तीव्र बनाएको छ ।

देउवा पक्षले महाधिवेशन तयारी, नेता कार्यकर्ता समन्वय तथा संगठन परिचालनका लागि नेता कोमलकान्त झालाई धनुषाको जिम्मेवारी दिएको जनाएको छ ।

झाले शनिबार जनकपुरधाममा आयोजित पत्रकार सम्मेलनमार्फत धनुषामा महाधिवेशनसम्बन्धी तयारी अघि बढाइएको जानकारी दिएका हुन् ।

उनका अनुसार वडा तहदेखि जिल्ला तहसम्मका नेता तथा कार्यकर्ताबीच समन्वय गर्दै अधिवेशन प्रक्रियालाई व्यवस्थित बनाउन आवश्यक छलफल र संगठन परिचालनलाई निरन्तरता दिइनेछ ।

पत्रकार सम्मेलनमा झाका अनुसार यसअघि धनुषाका देउवा पक्षीय नेता तथा कार्यकर्ताबीच जिल्लास्तरीय बैठकसमेत सम्पन्न भएको थियो । बैठकमा वडा, पालिका, क्षेत्र र जिल्ला तहमा संगठनात्मक तयारी, नेता कार्यकर्ताबीच समन्वय तथा महाधिवेशनका लागि आवश्यक तयारीबारे छलफल भएको थियो ।

यस्तो छ देउवा पक्षको प्रस्तावित कार्यतालिका
झाका अनुसार देउवा पक्षले अघि सारेको कार्यतालिकाअनुसार असोज १५ गते वडा अधिवेशन, असोज २० गते पालिका अधिवेशन, असोज २३ गते क्षेत्रीय अधिवेशन, कात्तिक १५ गते जिल्ला अधिवेशन, मंसिर ४ गते प्रदेश अधिवेशन तथा मंसिर २१, २२ र २३ गते केन्द्रीय महाधिवेशन गर्ने तयारी गरिएको छ ।

धनुषामा पनि सोही कार्यतालिकालाई आधार बनाएर अधिवेशनको तयारी अघि बढाउने झाको भनाइ छ । उनले जिल्लाका सबै तहका नेता तथा कार्यकर्तासँग समन्वय गरी संगठनलाई सक्रिय बनाउने र अधिवेशनमा आवश्यक तयारी पूरा गर्ने जानकारी दिए ।

कांग्रेसको १५औँ महाधिवेशनलाई लिएर पार्टीभित्र भने फरकफरक कार्यतालिकाअनुसार तयारी अघि बढिरहेको छ । सभापति गगनकुमार थापा नेतृत्वको पक्षले असोज ३ र ४ गते वडा अधिवेशनबाट प्रक्रिया अघि बढाएको छ भने देउवा पक्षले असोज १५ गतेदेखि छुट्टै कार्यतालिकाअनुसार अधिवेशन प्रक्रिया अघि बढाउने जनाएको छ ।

धनुषामा देउवा पक्षले आफ्नो संगठनात्मक तयारीलाई तीव्रता दिएसँगै जिल्लामा कांग्रेसको आन्तरिक महाधिवेशन गतिविधि थप सक्रिय बनेको छ ।

पत्रकार सम्मेलनमा जिल्ला उपसभापति लक्ष्मीनारायण यादव, पूर्वसांसद स्मृतिनारायण चौधरी, पूर्वसांसद प्रमिला दास, पूर्वजिल्ला सभापति महेशशंकर गिरी, जिल्ला सचिव कन्हैया कर्ण, वरिष्ठ नेता गणेश तिवारी, जनकपुरधाम उपमहानगरपालिकाका उपप्रमुख किशोरी साह, प्रजातन्त्र सेनानी संघ मधेश प्रदेशका अध्यक्ष रामभरत साह, जिल्ला समन्वय समिति धनुषाकी उपसभापति संगिता ठाकुर, मुस्लिम संघ धनुषाका अध्यक्ष मो. इब्राहिम तथा क्षेत्रीय सभापति रामचन्द्र पजियारलगायतको सहभागिता रहेको थियो ।

त्यस्तै, नेता सुरेश कोइराला, तरुण दल धनुषाका अध्यक्ष सञ्जय लाभ कर्ण, क्षेत्रीय सचिव हरि राउत, कमलकान्त झा तथा विभिन्न तहका पदाधिकारी, युवा र महिला प्रतिनिधिहरूको समेत सहभागिता रहेको थियो ।