राजकुमार सन्तोषीले ३२ बर्ष पछि सलमानसँग मिलेर फिल्म बनाउने

मुम्बई, ९ भदौ । अमिर खान प्रोडक्सनको ‘बटवारा १९४७’ पछि निर्देशक राजकुमार सन्तोषी आफ्ना आगामी परियोजनाहरूको तयारीमा जुटेका छन्।

उनी अक्टोबर महिनामा सनी देओलसँग एउटा एक्सन चलचित्रको छायाङ्कन सुरु गर्ने तयारीमा छन्। यसका साथै, उनले सलमान खानसँग एउटा कमेडी चलचित्र बनाउने योजना पनि सार्वजनिक गरेका छन्। यदि सबै कुरा योजना अनुसार अघि बढेमा करिब ३२ वर्षपछि राजकुमार सन्तोषीको चलचित्रमा सलमानको पूर्ण भूमिकामा पुनरागमन हुनेछ।

राजकुमार सन्तोषी अहिले  ‘बटवारा १९४७’ को प्रदर्शन प्रमोशनमा रहेका छन । यसै क्रममा उनले ‘टाइम्स नाउ’ लाई दिएको अन्तर्वार्तामा सलमानसँग एउटा परियोजनाबारे छलफल भइरहेको खुलासा गरे। राजकुमार भन्छन्, ‘सलमानसँग छलफल चलिरहेको छ, त्यो परियोजना पनि पक्का हुनेछ। म एक पटकमा एउटा वा दुईवटा चलचित्रमा मात्र काम गर्न सक्छु तर सलमानसँग एउटा चलचित्र बन्ने पक्का छ। म यसका लागि निकै उत्साहित छु।’

केही समययता इन्टरनेटमा राजकुमारले ‘अन्दाज अपना अपना’को सिक्वेल बनाउनुपर्ने माग उठिरहेको छ। सलमानसँग मिलेर त्यस्तो कुनै चलचित्र बनाउने योजनाबारे सोधिँदा राजकुमार भन्छन्, ‘म ‘अन्दाज अपना अपना’ को सिक्वेल बनाउँदै छैन, त्यसैले यस विषयमा कुनै दबाब छैन। म एउटा अर्कै चलचित्र बनाउँदै छु–जुन उस्तै प्रकृतिको र उस्तै विधा (कमेडी) को होतर त्यो ‘अन्दाज अपना अपना २’ भने होइन। त्यो बनाउनुपर्ने आवश्यकता नै छैन।’

सलमानले लामो समयदेखि लगातार एक्सन चलचित्रहरूमा काम गर्दै आएका छन्, दर्शकहरूले उनलाई ‘नो इन्ट्री’ र ‘पार्टनर’ जस्ता कमेडी चलचित्रमा देखेको पनि धेरै समय भइसकेको छ। उनका आगामी परियोजनाहरू पनि एक्सन विधाकै भएकाले राजकुमार सन्तोषीबाट आउने कुनै नयाँ जानकारीले दर्शकका लागि केही नौलोपन ल्याउन सक्छ। यदि सबै कुरा मिलेमा ‘अन्दाज अपना अपना’को ३२ वर्षपछि सलमान र राजकुमारले पूर्ण लम्बाइको चलचित्रमा सहकार्य गर्नेछन्।

संयोगवश, सलमानले राजकुमारद्वारा निर्देशित ‘अजब प्रेम की गजब कहानी, २००९’ मा पनि अभिनय गरेका थिए भने ‘फटा पोस्टर निकला हिरो, २०१३’ मा पनि छोटो भूमिकामा देखिएका थिए। तर, ती चलचित्रहरूमा उनको भूमिका पूर्ण थिएन, त्यो केवल एक छोटो उपस्थिति अर्थात क्यामियो मात्र थियो।

राजकुमार र सलमानले सन् १९९४ को चलचित्र ‘अन्दाज अपना अपना’ मा पहिलो पटक सँगै काम गरेका थिए। यद्यपि यो चलचित्र बक्स अफिसमा असफल भयो तर समयसँगै यो यति लोकप्रिय बन्यो कि यसले अहिले ‘कल्ट’दर्जा प्राप्त गरेको छ। सलमानका साथै यस चलचित्रमा आमिर खान, रविना टन्डन, करिश्मा कपुर, परेश रावल र शक्ति कपुरको पनि अभिनय रहेको थियो।

केही समयअघि निर्माताहरूले उक्त चलचित्र पुनः प्रदर्शनमा ल्याएका थिए। त्यसताका राजकुमार, आमिर र सलमानलाई समेटेर यसको ‘सिक्वेल’ बनाउनु पर्ने माग उठेको थियो तर उनले यसो गर्न स्पष्ट रूपमा अस्वीकार गरेका छन । यद्यपि, वर्षौंअघि उनले संकेत गरेका थिए कि यदि सिक्वेल बनाउनु परेमा उनी नयाँ कलाकारहरूलाई नै लिन रुचाउने छन्।

संयोगवश, राजकुमारले सलमानसँग चलचित्र बनाउने योजना हालसालै मात्र होइन, विगत एक दशकदेखि नै बनाउँदै आएका छन्। सन् २०१६ मा यस्ता खबरहरू आएका थिए कि उनी सलमानका भिनाजु अतुल अग्निहोत्रीको निर्माण ब्यानरमा एउटा कमेडी चलचित्र बनाउने तयारीमा थिए। यसका लागि सलमानलाई मुख्य भूमिकामा लिने तयारी थियो तर यो चलचित्र अन्ततः बन्न सकेन।

सन् २०२१ मा राजकुमारले सलमानलाई यस्तो चुनौतीपूर्ण भूमिकामा प्रस्तुत गर्ने योजना रहेको बताएका थिए, जुन उनले यसअघि कहिल्यै निभाएका थिएनन् । यद्यपि, त्यस परियोजनाबारे पनि थप कुनै जानकारी आएन। अब, वर्षौं पछि उनले फेरि एकपटक सलमानका प्रशंसकहरूमा आशा जगाएका छन्, यद्यपि यो वास्तवमै साकार हुन्छ कि हुँदैन भनेर हेर्न हामीले अझै लामो समय कुर्नु पर्नेछ।