मुम्बई/साउन २२ गते। बलिउडमा ‘गजनी’ का रूपमा चर्चित अभिनेता प्रदीप रावतको ७४ वर्षको उमेरमा क्यान्सरका कारण निधन भएको छ।
उनले नेपाली चलचित्र ‘ह्स्व दिर्घ’ र ‘आ…वाट आमा’ मा पनि अभिनय गरेर नेपाली दर्शकको मन जीतेका थिए । उनी भारतीय चलचित्र जगतका ती कलाकारहरूमध्ये एक थिए, जसले हिन्दी र दक्षिण भारतीय दुवै चलचित्र उद्योगमा आफ्नो छुट्टै पहिचान बनाएका थिए।
सन् १९९५ देखि यस क्षेत्रमा सक्रिय रावतले हिन्दी, तेलुगु, तमिल र मलयालम चलचित्रहरूमा खलनायकको सशक्त भूमिका निर्वाह गरेर दर्शकहरूको मन जितेका उनी सफल अभिनेता मध्य एक मानिन्थे । तर, के तपाईंलाई थाहा छ, १०० करोड भारु कमाउने पहिलो चलचित्रमा अभिनय गर्ने बलिउड खलनायक उनी नै थिए भन्ने। थाहा नभए, हामी जानकारी दिनेछौं ।
प्रदीप रावतले बलिउड देखि दक्षिण भारतीय चलचित्र उद्योगसम्मका चलचित्रहरूमा मुख्यतया खलनायकको भूमिका निर्वाह गरे र यस क्षेत्रमा उल्लेखनीय सफलता हासिल पनि गरे। बक्स अफिसको इतिहासमा उनको नाममा एउटा अद्वितीय र अटुट कीर्तिमान पनि कायम छ। सन् २००८ को डिसेम्बरमा आमिर खानको एक्सन थ्रिलर चलचित्र ‘गजनी’ प्रदर्शन हुँदा यसले बक्स अफिसका अघिल्ला सबै कीर्तिमानहरू तोड्यो र स्वदेशी बक्स अफिसमा १०० करोड रुपैयाँ नेट) को आँकडा पार गर्ने पहिलो भारतीय चलचित्र बन्यो।
चाखलाग्दो कुरा के छ भने प्रदीप रावतले यसै चलचित्रमार्फत बलिउडमा खलनायकका रूपमा डेब्यु गरेका थिए। यस चलचित्रसँगै उनी १०० करोडभन्दा बढी कमाइ गर्ने चलचित्रको हिस्सा बन्ने पहिलो बलिउड खलनायक बने, जुन उपलब्धिले भारतीय सिनेमामा ‘१०० करोड क्लब’को सुरुवातलाई चिह्नित गरेको थियो।
प्रदीप रावतले सन् १९८८ मा बी आर चोपडाको ‘महाभारत’मा अश्वत्थामाको भूमिका निर्वाह गर्दै साना पर्दामा डेब्यु गरेका थिए। त्यसपछि उनले केही साना तथा श्रेय नदिइएका भूमिकाहरूमा काम गरे। उनको करियरको एउटा महत्त्वपूर्ण मोड एसएस राजामौलीको चलचित्र ‘साइ’ साबित भयो, जसमा उनले नितिनको विपक्षमा खलनायकको भूमिका निभाएका थिए । यस चलचित्रका लागि उनले सन् २००४ मा ‘सर्वश्रेष्ठ खलनायक, तेलुगु’ विधामा पहिलो फिल्मफेयर अवार्ड पनि जितेर किर्तिमान बनाएका थिए ।
यी अभिनेताले तीनैजना खानहरूसँग काम गरेका छन्, तर उनले आमिर खानसँग सरफरोश, लगान र गजनीमा आफ्ना सबैभन्दा महत्त्वपूर्ण भूमिकाहरू निर्वाह गरे। मूल तमिल चलचित्र ‘गजनी’ मा सूर्याको विपक्षमा खलनायकको भूमिका निभाए पछि उनले आमिर खानको ‘गजनी’मा पनि त्यही खलनायकको भूमिका दोहोर्याए र आफ्नो सशक्त अभिनयमार्फत दर्शकहरूलाई निकै प्रभावित पारे।
प्रदीप रावतको जन्म सन् १९५२ को जनवरी २१ मा मध्य प्रदेशको जबलपुरमा भएको थियो र उनले चार दशकभन्दा लामो अभिनय यात्रा तय गरेका छन् । हिन्दी चलचित्रका साथै उनीसँग तेलुगु, तमिल, नेपाली र अन्य भाषाका चलचित्रहरूमा पनि काम गरेको अनुभव थियो। उनले थुप्रै सशक्त सहायक तथा नकारात्मक भूमिका मार्फत बलिउडमा निकै चर्चित अनुहारको रूपमा पहिचान बनाए।
रावतले आमिर खानको चलचित्र ‘सरफरोश, १९९९’ मा सुल्तानको भूमिका निभाए, ओस्कारका लागि मनोनयनमा परेको ‘लगान, २००१’ मा फास्ट बलर देवा सिंह सोढीका रूपमा सशक्त अभिनय गरे र निर्दयी ‘गजिनी धर्मात्मा’ को भूमिकाका लागि त उनले निकै प्रशंसा बटुलेका थिए ।
Discussion about this post