रणवीरको ‘रामायण’ बिबादमा, हलमा लैजानु अघि देखाउन रामलिला महासंघको माग

मुम्बई/साउन १८ गते । रणवीर कपुर, सनी देओल र यशको अभिनय रहेको चलचित्र ‘रामायण’ लाई लिएर विवाद उत्पन्न भएको छ।

श्री रामलीला महासंघले चलचित्रका निर्देशक नितेश तिवारी र निर्माण कम्पनीलाई सम्बोधन गर्दै एक पत्रमार्फत चेतावनी जारी गरेको छ। महासंघका अध्यक्ष अर्जुन कुमारले यस वर्षको दीपावलीमा भारत र विदेशमा प्रदर्शन हुनुअघि चलचित्र आफ्नो प्रतिनिधिमण्डललाई देखाइनु पर्ने माग गरेका छन्।

महासंघले जनाए अनुसार प्राप्त जानकारीका आधारमा उक्त चलचित्रमा हिन्दूहरूको भावनामा चोट पुर्‍याउन सक्ने केही दृश्यहरू समावेश हुन सक्छन्। यदि विवादित दृश्यहरू हटाइएन भने चलचित्र हलहरू बाहिर विरोध प्रदर्शन गरिनेछ। यद्यपि, निर्देशक नितेश तिवारी वा चलचित्र निर्माण पक्षबाट हालसम्म कुनै आधिकारिक विज्ञप्ति जारी गरिएको छैन।

श्री रामलीला महासंघका अध्यक्ष अर्जुन कुमारले एक पत्रमार्फत उक्त चलचित्र हलमा प्रदर्शन हुनु अघि महासंघका लागि विशेष रूपमा देखाइनु पर्ने माग गरेका छन्। भगवान् राम, रामायणका पात्रहरू वा सनातन धर्मसँग सम्बन्धित कुनै पनि आपत्तिजनक दृश्य वा संवाद उक्त चलचित्रमा छैनन् भन्ने कुरा सुनिश्चित गर्न महासंघले यस्तो गर्न चाहेको हो।

कुमारले चेतावनी दिएका छन् कि यदि निर्माताहरूले यो माग पूरा गरेनन् भने, हिन्दू संगठनहरूसँगको सहकार्यमा हजारौं कार्यकर्ताहरूले दिल्ली र देशका अन्य राज्यहरूमा रहेका सिनेमा हलहरू बाहिर विरोध प्रदर्शन तथा धर्ना कार्यक्रम गर्नेछन्।

महासंघले आफ्नो पत्रमा सन् २०२३ को चलचित्र ‘आदिपुरुष’को उदाहरण प्रस्तुत गरेको छ। अर्जुन कुमारले स्मरण गरे अनुसार भूषण कुमारद्वारा निर्मित तथा प्रभास र सैफ अली खानको अभिनय रहेको उक्त चलचित्रका विभिन्न दृश्यहरूमा सनातन समुदाय र रामलीलासँग आबद्ध व्यक्तिहरूले कडा आपत्ति जनाएका थिए।

सो चलचित्रमा लंकाको सुनको सहरलाई कालो रङमा देखाइएको थियो भने परम ज्ञानी रावण र उनको सेनालाई मंगोल लुटेराहरूजस्तै चित्रण गरिएको थियो। यस व्यापक विरोधका कारण करोडौंको बजेटमा बनेको उक्त चलचित्र बक्स अफिसमा असफल साबित भयो।