जनकपुरधाम/साउन ८ गते। घरेलु हिंसाबाट गम्भीर घाइते भई उपचाररत सिराहाको नवराजपुर गाउँपालिका–४ की संजना यादवलाई राष्ट्रिय स्वतन्त्र पार्टी (रास्वपा) का सांसद शिव यादवले अस्पताल पुगेर भेट गरेका छन्।
उपचाररत संजनाको स्वास्थ्य अवस्थाबारे जानकारी लिँदै सांसद यादवले घटनाप्रति गहिरो दुःख व्यक्त गरेका छन्। उनले पीडितलाई न्याय दिलाउन आवश्यक पहल गर्ने प्रतिबद्धता जनाउँदै घटनामा संलग्न दोषीमाथि कानुनबमोजिम कडा कारबाही हुनुपर्ने बताएका छन्।
पीडित संजनाले आफ्ना श्रीमान रामशंकर यादव र देबर श्यामसुन्दर यादवले कुटपिट गर्नुका साथै तातेको रडले पोलाएको आरोप लगाएकी छन्। उक्त घटनापछि उनी गम्भीर घाइते भई उपचाररत छिन्।
प्रहरीका अनुसार घटनामा संलग्न रहेको आरोपमा संजनाका श्रीमान रामशंकर यादवलाई पक्राउ गरिएको छ। अर्का आरोपित श्यामसुन्दर यादव भने फरार रहेका छन्। फरार आरोपितको खोजी कार्य जारी रहेको र घटनाबारे थप अनुसन्धान भइरहेको प्रहरीले जनाएको छ।
Discussion about this post