कानूनी ज्ञानको अभावले अदालतमा मुद्दाको चाप बढेको छ : मुख्यमन्त्री कृष्ण यादव

जनकपुरधाम/असार २१ गते । मधेश प्रदेशका मुख्यमन्त्री कृष्ण यादवले नागरिकमा कानूनी ज्ञानको अभावका कारण अदालतहरूमा मुद्दाको चाप बढ्दै गएको बताएका छन्।

मुख्य न्यायाधिवक्ताको कार्यालय, मधेश प्रदेशद्वारा जनकपुरधाममा आयोजित ‘समसामयिक तथा संवैधानिक कानुनी सवालमा छलफल तथा अन्तरक्रिया’ कार्यक्रममा बोल्दै मुख्यमन्त्री यादवले कानुनसम्बन्धी पर्याप्त जानकारी नहुँदा धेरै नागरिक अनजानमै कानुन उल्लंघन गर्ने अवस्थामा पुग्ने गरेको बताए।

उनले नेपाल अझै पूर्ण रूपमा कानूनी रूपमा सचेत समाज बन्न नसकेको उल्लेख गर्दै प्रत्येक नागरिकमा कानूनी शिक्षा र जनचेतना विस्तार गर्न आवश्यक रहेको धारणा व्यक्त गरे। जघन्य अपराधमा संलग्न व्यक्तिलाई कानुनबमोजिम कारबाही हुनुपर्ने भए पनि सामान्य प्रकृतिका घटनामा व्यवहारिक पक्षलाई समेत ध्यान दिनुपर्ने उनको भनाइ थियो।

मुख्यमन्त्री यादवले नेपालका कारागारमा रहेका सबै कैदी वास्तविक अर्थमा दोषी नै छन् भन्ने निष्कर्षमा पुग्न नसकिने उल्लेख गर्दै कतिपय व्यक्ति कागजी प्रमाणका आधारमा मात्रै कैद जीवन बिताइरहेको अवस्था रहेको दाबी गरे।

कार्यक्रममा मधेश प्रदेशका गृह, सञ्चार तथा कानून मन्त्री फकिरा महतोले न्याय प्रणालीलाई समयानुकूल र प्रभावकारी बनाउन आवश्यक रहेको बताए। संविधान समय, समाज र आवश्यकताअनुसार परिमार्जन हुँदै जाने भएकाले कानुन तथा न्याय प्रणालीमा पनि सोहीअनुसार सुधार र परिवर्तन अपरिहार्य रहेको उनको भनाइ थियो।

मन्त्री महतोले सामाजिक, सांस्कृतिक तथा भाषिक विविधतायुक्त मधेश प्रदेशमा सबै नागरिकको न्यायमा सहज पहुँच सुनिश्चित गर्न न्याय प्रणालीलाई अझ प्रभावकारी, समावेशी र उत्तरदायी बनाउनुपर्नेमा जोड दिए।

मधेश प्रदेशका मुख्य न्यायाधिवक्ता सुनिल रञ्जन सिंहको अध्यक्षतामा सम्पन्न कार्यक्रममा सर्वोच्च अदालतका न्यायाधीश कुमार रेग्मी, उच्च अदालत तथा जिल्ला अदालतका न्यायाधीशहरू, कानुन व्यवसायी तथा कानुन क्षेत्रसँग सम्बन्धित विभिन्न सरोकारवालाको सहभागिता रहेको थियो।