वैदेशिक रोजगारीबाट फर्किएका श्रमिकको सीप स्वदेशमै उपयोग गर्नुपर्नेमा जोड

जनकपुरधाम/असार १४ गते। वैदेशिक रोजगारीबाट फर्किएका नेपाली श्रमिकहरूको सीप, अनुभव र क्षमतालाई स्वदेशमै उपयोग गर्दै पुनःएकीकरण, रोजगारी सिर्जना तथा उद्यमशीलता प्रवर्द्धन गर्न सरोकारवालाहरूले जोड दिएका छन्।

नेपाल उद्योग वाणिज्य संघ मधेसद्वारा आयोजित ‘वैदेशिक रोजगारीबाट फर्किएका व्यक्तिहरूको पुनःएकीकरण सम्बन्धी प्रदेशस्तरीय अन्तरक्रिया कार्यक्रम’ मा सहभागीहरूले वैदेशिक रोजगारीबाट फर्किएका श्रमिकलाई श्रम बजारसँग प्रभावकारी रूपमा जोड्न सके देशको आर्थिक विकासमा महत्वपूर्ण योगदान पुग्ने धारणा व्यक्त गरे।

कार्यक्रममा निजी क्षेत्रका प्रतिनिधिहरूले नेपालमा दक्ष प्राविधिक जनशक्तिको अभाव बढ्दै गएको उल्लेख गर्दै उद्योग–व्यवसाय सञ्चालनका लागि आवश्यक सीपयुक्त कामदार सहज रूपमा उपलब्ध हुन नसकेको बताए। उनीहरूले विदेशबाट फर्किएका श्रमिकको अनुभव र दक्षतालाई उचित व्यवस्थापन गर्न सके स्वदेशमै रोजगारीका अवसर विस्तार हुनुका साथै उद्योग क्षेत्रले पनि दक्ष जनशक्ति प्राप्त गर्ने विश्वास व्यक्त गरे।

छलफलका क्रममा वैदेशिक रोजगारीबाट फर्किएका धेरै श्रमिकले आफ्नो योग्यता र अनुभवअनुसारको रोजगारी नपाउने, रोजगारदाता र श्रमिकबीच विश्वासको कमी तथा श्रम बजारसँग समन्वय कमजोर रहेका कारण पुनः विदेश जान बाध्य हुने अवस्था रहेको औँल्याइएको थियो।

सहभागीहरूले सीप प्रमाणीकरण प्रणालीलाई प्रभावकारी बनाउने, रोजगार सूचना प्रणाली सुदृढ गर्ने, श्रमिक र रोजगारदाताबीच पारदर्शी तथा विश्वासयुक्त सम्बन्ध विकास गर्ने र नियमित समन्वय बढाउने आवश्यकता औँल्याए।

कार्यक्रममा मधेश प्रदेशको श्रम तथा रोजगार मन्त्रालयका वरिष्ठ उपसचिव धनञ्जय सिंहले आगामी आर्थिक वर्षदेखि प्रदेश सरकारले आवश्यकता र मागका आधारमा योजना सञ्चालन गर्ने प्रतिबद्धता व्यक्त गर्दै श्रमिकको सीप विकास तथा पुनःस्थापनालाई प्राथमिकतामा राखिने बताए।

त्यसैगरी, कार्यक्रममा रेमिट्यान्सको अधिकांश हिस्सा उपभोगमा खर्च हुने र उत्पादनमूलक क्षेत्रमा न्यून लगानी हुने अवस्थाप्रति चिन्ता व्यक्त गर्दै कृषि, उद्योग, उद्यमशीलता तथा अन्य उत्पादनशील क्षेत्रमा रेमिट्यान्स परिचालन गर्न नीतिगत पहल आवश्यक रहेको धारणा राखियो।

नेपाल उद्योग वाणिज्य महासंघका केन्द्रीय सदस्य तथा सिरहा उद्योग वाणिज्य संघका अध्यक्ष अमरनाथ साहको अध्यक्षतामा सम्पन्न कार्यक्रममा सुखीपुर उद्योग व्यापार समितिका अध्यक्ष सूर्यनारायण यादव, नेपाल उद्योग वाणिज्य संघ मधेसका कार्यकारिणी सदस्य प्रदीप भट्टराईलगायतले वैदेशिक रोजगारीबाट फर्किएका श्रमिकको पुनःएकीकरणका लागि सरकार, निजी क्षेत्र र सरोकारवाला निकायबीच सहकार्य अपरिहार्य रहेको बताएका थिए।