कमला नदीको डाइभर्सन भासियो, सिरहा–धनुषा आवागमन पूर्ण रूपमा अवरुद्ध

धनुषा/असार ७ गते। सिरहा र धनुषा जिल्लालाई जोड्ने कमला नदीस्थित अस्थायी डाइभर्सन भासिएपछि आइतबार बिहानदेखि दुवै जिल्लाबीचको सवारी आवागमन पूर्ण रूपमा अवरुद्ध भएको छ ।

गएरातिको वर्षापछि कमला नदीको बहाव बढ्दा डाइभर्सनको ठूलो भाग थप भासिएको हो । यससँगै बिहानदेखि सवारीसाधन सञ्चालन पूर्ण रूपमा ठप्प भएको स्थानीयवासीले बताएका छन् ।

सिरहाको बसबिट्टा क्षेत्रतर्फ करिब एक करोड २५ लाख रुपैयाँ लागतमा निर्माण गरिएको तारजाली तथा माटोयुक्त अस्थायी डाइभर्सन केही महिनाअघि मात्रै सञ्चालनमा ल्याइएको थियो । तर वर्षा र नदीको बढ्दो बहावका कारण संरचना कमजोर बन्दै गएपछि आइतबारदेखि पूर्ण रूपमा प्रयोगविहीन बनेको छ ।
स्थानीयका अनुसार डाइभर्सन क्षतिग्रस्त भएपछि सिरहा–धनुषा आवागमन प्रभावित भएको छ । केही मोटरसाइकल चालकले जोखिम मोलेर नदी पार गर्ने प्रयास गरे पनि सुरक्षा जोखिमका कारण आवतजावत रोकिएको छ ।

सवारी आवागमन बन्द भएपछि सर्वसाधारण डुङ्गाको भरमा नदी वारपार गर्न बाध्य भएका छन् । सिरहा नगरपालिका–५ स्थित बसबिट्टा घाटमा हाल डुङ्गामार्फत यात्रु ओसारपसार भइरहेको छ । वडाध्यक्ष इन्द्रजित यादवले यात्रुहरूले नदी पार गर्न प्रतिव्यक्ति १५० रुपैयाँ तिर्नुपर्ने अवस्था रहेको जानकारी दिए । डाइभर्सन बन्द भएपछि दैनिक कामकाज, व्यापारिक गतिविधि तथा विद्यार्थीहरूको आवागमनमा समेत समस्या उत्पन्न भएको उनले बताए ।
यसैबीच, कमला नदीमाथि निर्माणाधीन पुल वर्षौंदेखि अलपत्र अवस्थामा रहेको छ । हुलाकी राजमार्गअन्तर्गत पर्ने उक्त पुलको ठेक्का २०६८ सालमै सम्झौता भए पनि पटकपटक म्याद थपिँदा समेत निर्माण कार्य सम्पन्न हुन सकेको छैन ।

बाढी, प्राविधिक समस्या तथा निर्माणमा भएको ढिलाइका कारण परियोजना लामो समयदेखि अधुरो रहेको स्थानीयको गुनासो छ । हरेक वर्ष वर्षायाममा डाइभर्सन बग्ने वा भासिने समस्या दोहोरिने गरेकाले स्थानीयवासीले स्थायी समाधानका लागि पुल निर्माण कार्य शीघ्र सम्पन्न गर्न सम्बन्धित निकायसँग माग गरेका छन् । स्थानीयको भनाइमा, पुल निर्माणमा भएको ढिलाइले वर्षेनी हजारौं नागरिकलाई सास्ती खेप्न बाध्य बनाएको छ । डाइभर्सन बन्द भएसँगै पुनः एकपटक सिरहा र धनुषावासीले आवागमनको गम्भीर समस्या झेल्नुपरेको छ ।