धनुषा/जेठ ३१ गते । मधेस प्रदेश सरकारले आर्थिक वर्ष २०८२/८३ को आर्थिक सर्वेक्षण प्रदेशसभामा प्रस्तुत गर्दै प्रदेशको अर्थतन्त्रको समग्र अवस्था सार्वजनिक गरेको छ। आगामी आर्थिक वर्षको बजेट प्रस्तुत गर्नुअघि आइतबार प्रदेशका अर्थमन्त्री युवराज भट्टराईले प्रदेशसभामा आर्थिक सर्वेक्षण पेश गरेका हुन्।
सर्वेक्षणअनुसार मधेस प्रदेशको कुल ग्राहस्थ उत्पादन (जीडीपी) चालु आर्थिक वर्षमा करिब ८ खर्ब ६३ अर्ब रुपैयाँ पुग्ने अनुमान गरिएको छ। यो राष्ट्रिय कुल ग्राहस्थ उत्पादनको १३.१ प्रतिशत हिस्सा रहेको उल्लेख गरिएको छ।
प्रदेशको आर्थिक वृद्धिदर १.३१ प्रतिशत रहने प्रक्षेपण गरिएको आर्थिक सर्वेक्षणमा कृषि, मत्स्य तथा वन क्षेत्रको योगदान सबैभन्दा बढी रहेको देखाइएको छ। प्रदेशको कुल ग्राहस्थ उत्पादनमा उक्त क्षेत्रको योगदान ३४.९७ प्रतिशत रहने अनुमान गरिएको छ भने यस क्षेत्रको वृद्धिदर १.४४ प्रतिशत रहने उल्लेख गरिएको छ।
कृषि उत्पादनतर्फ भने मिश्रित अवस्था देखिएको छ। अन्नबाली उत्पादन ५.३३ प्रतिशतले घट्ने अनुमान गरिए पनि पशुपालन तथा मत्स्य क्षेत्रबाट सकारात्मक संकेत प्राप्त भएको सर्वेक्षणले जनाएको छ। दूध उत्पादन ११.०६ प्रतिशत, मासु उत्पादन ३३.५२ प्रतिशत, माछा उत्पादन ८.०३ प्रतिशत तथा अण्डा उत्पादन २३.४६ प्रतिशतले वृद्धि हुने अनुमान गरिएको छ।
यद्यपि प्रदेशको राजस्व संकलनमा भने चुनौती देखिएको छ। आर्थिक सर्वेक्षणअनुसार राजस्व संकलनको अनुपात १.६६ प्रतिशतले घट्ने अनुमान गरिएको छ, जसले प्रदेशको वित्तीय व्यवस्थापनमा दबाब सिर्जना गर्न सक्ने संकेत गरेको छ।
आर्थिक सर्वेक्षणले कृषि तथा पशुपन्छीजन्य उत्पादनमा सुधारको सम्भावना देखाए पनि समग्र आर्थिक वृद्धिदर र राजस्व संकलन अपेक्षाकृत कमजोर रहने निष्कर्ष प्रस्तुत गरेको छ।
Discussion about this post