सिरहा–धनुषा जोड्ने कमला पुल निर्माणका लागि बजेट नछुट्याएको भन्दै प्रदेशसभा अगाडि प्रदर्शन

धनुषा/जेठ २९ गते। हुलाकी राजमार्गअन्तर्गत सिरहा र धनुषा जिल्लालाई जोड्ने नयाँ कमला पुल निर्माणका लागि आगामी आर्थिक वर्षको बजेटमा रकम विनियोजन नगरिएको भन्दै स्थानीयवासीले मधेश प्रदेशसभा अगाडि विरोध प्रदर्शन गरेका छन्।

कमला पुल निर्माण संघर्ष समितिको नेतृत्वमा भेला भएका स्थानीयहरूले प्रदेशसभा परिसर नजिक टायर बालेर सरकारविरुद्ध नाराबाजी गरेका हुन्। प्रदर्शनकारीहरूले पुल निर्माणमा वर्षौंदेखि बेवास्ता गरिएको आरोप लगाउँदै तत्काल आवश्यक बजेट व्यवस्था गर्न माग गरेका छन्।

प्रदर्शनका क्रममा सहभागीहरूले ‘नयाँ कमला पुल निर्माण गर’, ‘झुटा आश्वासन चाहिँदैन’ र ‘मनोमानी चल्दैन’ लगायतका नारा लगाएका थिए। उनीहरूले प्रदेश सरकारका मुख्यमन्त्री, अर्थमन्त्री तथा भौतिक पूर्वाधार विकास मन्त्रीप्रति असन्तुष्टि व्यक्त गर्दै पुल निर्माणलाई प्राथमिकतामा राख्न आग्रह गरेका छन्।

आन्दोलनकारीहरूका अनुसार प्रदेश सरकारले सार्वजनिक गरेको आगामी आर्थिक वर्षको बजेटमा कमला पुल निर्माणका लागि कुनै रकम नछुट्याएपछि विरोध प्रदर्शन गर्न बाध्य हुनुपरेको हो। उनीहरूले सिरहा र धनुषालाई जोड्ने उक्त पुल यातायात, व्यापार तथा आर्थिक गतिविधिका दृष्टिले अत्यन्त महत्वपूर्ण भएकाले यसको निर्माण कार्य तत्काल अघि बढाउनुपर्ने बताएका छन्।

यसअघि पनि संघर्ष समितिले संघीय सरकारले ल्याएको बजेटमा समेत कमला पुल निर्माणका लागि रकम विनियोजन नगरिएको भन्दै प्रदेशसभा अगाडि प्रदर्शन गरेको थियो। स्थानीयवासीले संघीय र प्रदेश दुवै सरकारले पुल निर्माणको विषयलाई निरन्तर उपेक्षा गरेको आरोप लगाएका छन्।

संघर्ष समितिले कमला पुल निर्माणका लागि आवश्यक बजेट सुनिश्चित नभएसम्म आन्दोलनका कार्यक्रमलाई थप सशक्त बनाउने चेतावनी समेत दिएको छ।