सभापतिलाई कारबाही गरिएपछि रास्वपा धनुषा अधिवेशन अनिश्चितकालका लागि स्थगित

धनुषा/जेठ २६ गते। राष्ट्रिय स्वतन्त्र पार्टी (रास्वपा) धनुषाको जिल्ला अधिवेशन अन्तिम समयमा आएर स्थगित गरिएको छ । मंगलबारका लागि तय गरिएको अधिवेशनमा विवाद चर्किने सम्भावना देखिएपछि अर्को सूचना जारी नभएसम्म कार्यक्रम रोकिएको हो ।
जिल्ला सभापति लक्ष्मेश्वर यादवमाथि केन्द्रीय अनुशासन आयोगले सोमबार अनुशासनात्मक कारबाही गर्दै पदबाट हटाउने निर्णय गरेपछि पार्टीभित्र असन्तुष्टि बढेको थियो । सोही विषयलाई लिएर अधिवेशनस्थलमा तनावपूर्ण अवस्था सिर्जना हुने संकेत देखिएपछि नेतृत्वले अधिवेशन स्थगित गर्ने निर्णय गरेको जनाएको छ ।

कार्यक्रमअन्तर्गत खुला सत्र सुरु गर्ने तयारी भइरहेका बेला जिल्ला पर्यवेक्षक बेचन यादवले सभापतिमाथि गरिएको कारबाहीको विरोध जनाउँदै उक्त विषय स्पष्ट नभएसम्म अधिवेशन अगाडि बढ्न नदिने अडान लिएका थिए । त्यसपछि निर्वाचन प्रक्रिया र अन्य कार्यक्रम प्रभावित बनेका थिए ।

केन्द्रीय अनुशासन आयोगका कार्यवाहक प्रमुख रमाकान्त रिमालका अनुसार लक्ष्मेश्वर यादवमाथि पार्टी विधान, आचारसंहिता तथा विभिन्न कार्यविधिको पालना नगरेको, पदीय जिम्मेवारीअनुसार कार्यसम्पादन गर्न नसकेको, संगठनभित्र अनावश्यक हस्तक्षेप गरेको तथा समूहगत गतिविधिलाई प्रोत्साहन दिएको आरोप लगाइएको छ । ती आधारमा उनलाई जिम्मेवारीबाट हटाउने निर्णय गरिएको आयोगले जनाएको छ ।

यसैबीच मधेस प्रदेशका विभिन्न जिल्लामा रास्वपाको संगठनात्मक अधिवेशनका क्रममा विवाद देखिन थालेको छ । कतिपय जिल्लामा खुला सत्रपछि बन्द सत्रमा मतभेद बढेर प्रक्रिया रोकिएको छ भने केही स्थानमा अधिवेशनको औपचारिक सुरुआतसमेत हुन सकेको छैन । आन्तरिक विवादका कारण प्रदेशका अधिकांश जिल्लामा अधिवेशन प्रक्रिया प्रभावित बन्दै गएको देखिएको छ ।