धनुषा/जेठ २४ गते । राष्ट्रिय स्वतन्त्र पार्टी (रास्वपा) जनकपुरधाम उपमहानगरपालिका समितिको प्रथम नगर अधिवेशनबाट ललन कुमार नायक नगर सभापतिमा निर्वाचित भएका छन्।
जनकपुरधामस्थित उद्योग वाणिज्य संघको सभाहलमा सम्पन्न अधिवेशनमा नयाँ नेतृत्व चयनका लागि सहमतिबाट टुंग्याउने प्रयास अन्तिम समयसम्म जारी रहे पनि सफल हुन नसकेपछि निर्वाचन प्रक्रियामार्फत नेतृत्व चयन गरिएको हो।
नगर सभापति पदका लागि ललन कुमार नायक र जितेन्द्र महासेठबीच प्रतिस्पर्धा भएको थियो। दुवै उम्मेदवारले उम्मेदवारी कायम राखेपछि मतदान गराइएको थियो।
निर्वाचन समितिका अनुसार कुल १७६ मत खसेकोमा नायकले १०५ मत प्राप्त गरी विजयी भए भने उनका प्रतिस्पर्धी महासेठले ७१ मत प्राप्त गरे। सहमतिमा नेतृत्व चयन गर्ने प्रयास सफल नभएपछि कार्यकर्ताको मतमार्फत नेतृत्वको टुंगो लागेको सहभागीहरूले बताएका छन्।
निर्वाचन परिणाम सार्वजनिक भएसँगै पार्टीका नेता, कार्यकर्ता तथा समर्थकहरूले नवनिर्वाचित नगर सभापति नायकलाई बधाई तथा सफल कार्यकालको शुभकामना व्यक्त गरेका छन्।
विजयपछि प्रतिक्रिया दिँदै नायकले संगठनभित्रको एकता र सहकार्यलाई थप मजबुत बनाउने प्रतिबद्धता व्यक्त गरे। उनले अधिवेशनमा फरक धारणा राख्ने कार्यकर्तासमेत पार्टीका महत्वपूर्ण शक्ति भएको उल्लेख गर्दै सबैलाई साथमा लिएर संगठन विस्तार गर्ने बताए।
उनले जनकपुरधाममा रास्वपालाई जनतासँग प्रत्यक्ष जोडिएको, जिम्मेवार र प्रभावकारी राजनीतिक शक्तिका रूपमा स्थापित गर्ने लक्ष्य रहेको बताए। साथै सुशासन, पारदर्शिता र जवाफदेहिताका मुद्दालाई स्थानीय तहसम्म पुर्याउँदै जनसरोकारका विषयमा सक्रिय भूमिका निर्वाह गर्ने प्रतिबद्धता जनाए।
नायकले अधिवेशन सफल बनाउन सहयोग गर्ने प्रतिनिधि, कार्यकर्ता तथा निर्वाचन प्रक्रियामा संलग्न सबैप्रति धन्यवाद व्यक्त गर्दै आगामी दिनमा संगठन सुदृढीकरण र विस्तार अभियानलाई तीव्रता दिने बताएका छन्।
Discussion about this post