धनुषा जिल्ला अदालत अगाडि मिटरब्याज पीडितहरुको धर्ना, आन्दोलन थप चर्काउने चेतावनी

धनुषा/जेठ १९ गते  । मिटरब्याज पीडितहरूले मंगलबार धनुषा जिल्ला अदालत अगाडि प्रदर्शन गर्दै धर्ना दिएका छन् । न्याय नपाएको गुनासो गर्दै उनीहरूले अदालत परिसर बाहिर नाराबाजीसहित विरोध जनाएका हुन् ।

मिटरब्याज पीडित संघर्ष समितिका केन्द्रीय अध्यक्ष अवधेश कुशवाहाको नेतृत्वमा आयोजित प्रदर्शनमा सहभागीहरूले सरकारले समस्या समाधानकालागि प्रभावकारी कदम नचालेको आरोप लगाए । लामो समयदेखि न्यायको माग गर्दै आए पनि उल्टै उजुरी, दबाब र प्रताडना बढ्दै गएको पीडितहरूको भनाइ थियो ।

प्रदर्शनका क्रममा अध्यक्ष कुशवाहाले सत्ता परिवर्तन र गृहमन्त्री फेरिए पनि मिटरब्याज पीडितको समस्या ज्यूँका त्यूँ रहेको टिप्पणी गरे । चुनावअघि विभिन्न आश्वासन दिइए पनि व्यवहारमा पीडितलाई राहत दिनेतर्फ कुनै ठोस काम नभएको उनको आरोप थियो ।

यसअघि पनि पीडितहरूले जिल्ला प्रशासन कार्यालय धनुषा अगाडि धर्ना दिँदै सरकारको ध्यानाकर्षण गराएका थिए । अदालत र प्रशासनबाट साहु पक्षलाई बढी संरक्षण मिल्ने गरेको आरोप लगाउँदै उनीहरूले निष्पक्ष न्याय नपाएको गुनासो गरेका छन् ।
‘कालो कोट होसियार’, ‘मिटरब्याजीलाई कारबाही गर’, ‘फर्जी तमसुक खारेज गर’ तथा ‘अदालत, प्रहरी र प्रशासनको दमन बन्द गर’ जस्ता नारा लगाउँदै पीडितहरू जनकपुरधाम उपमहानगरपालिका–४ स्थित मण्डल कुटीबाट जुलुससहित अदालततर्फ पुगेका थिए ।

जिल्ला अदालत र उच्च अदालत प्रवेशमार्गमा प्रहरीद्वारा ब्यारिकेट लगाएपछि उनीहरू अदालतभित्र प्रवेश गर्न सकेनन् । त्यसपछि प्रदर्शनकारीहरू बाहिरै बसेर धर्ना र नाराबाजीलाई निरन्तरता दिएका थिए ।
पीडितहरूले आफ्ना माग सम्बोधन नभए आन्दोलनलाई अझ सशक्त बनाइने चेतावनी समेत दिएका छन् ।