जनकपुरधाम घर जग्गा व्यवसायी संघको दोस्रो साधारण सभा सम्पन्न

धनुषा/चैत १४ गते। जनकपुरधाम घर जग्गा व्यवसायी संघको दोस्रो साधारण सभा सम्पन्न भएको छ। संघको आयोजनामा जनकपुरधाम जेसिजको सभाहलमा सम्पन्न उक्त साधारण सभाको अध्यक्षता संघका अध्यक्ष रन्जित पजियारले गरेका थिए।

कार्यक्रममा संघका महासचिव सुरेन्द्र साहले आर्थिक प्रतिवेदन प्रस्तुत गर्दै संघको आय–व्यय विवरण सार्वजनिक गरेका थिए। प्रस्तुत प्रतिवेदनमाथि सहभागी सदस्यहरूले छलफल गर्दै आवश्यक सुझावहरू समेत दिएका थिए।

साधारण सभामा घरजग्गा कारोबारमा देखिएका समस्या, चुनौती तथा समाधानका उपायहरूबारे विस्तृत रूपमा छलफल गरिएको थियो। व्यवसायलाई मर्यादित र कानुनी दायराभित्र राख्न सबै व्यवसायी एकजुट भएर अघि बढ्नुपर्नेमा वक्ताहरूले जोड दिएका थिए।

कार्यक्रमको सञ्चालन संघका वरिष्ठ उपाध्यक्ष विजय कुमार यादवले गरेका थिए। साधारणसभामा अतिथिहरुमा संघका सल्लाहकार अम्भु प्रसाद साह, अरुण मिश्र, रामविनय महतो, विरेन्द्र पासवान लगायतको उपस्थिति रहेको थियो।

साथै साधारण सभामा संघका कार्यसमितिका पदाधिकारी, सदस्यहरू, पत्रकार तथा अन्य सरोकारवालाहरूको उल्लेखनीय सहभागिता रहेको थियो। कार्यक्रमको अन्त्यमा आगामी कार्ययोजना तय गर्दै संघलाई थप सुदृढ र प्रभावकारी बनाउने प्रतिबद्धता व्यक्त गरिएको थियो।