धनुषा–३ मा रास्वपाप्रति युवाको आकर्षण बढ्दो, व्यवसायी नेतासहित सयौं प्रवेश

धनुषा/फागुन १० गते । राष्ट्रिय स्वतन्त्र पार्टी (रास्वपा) प्रति धनुषा निर्वाचन क्षेत्र नम्बर ३ मा युवाहरूको आकर्षण बढ्दै गएको देखिएको छ। पछिल्ला केही दिनयता निरन्तर रूपमा युवाहरू रास्वपामा प्रवेश गरिरहेका छन्। यसै क्रममा आलु प्याज व्यवसायी संघ जनकपुरधामका अध्यक्ष सुरज साह रास्वपामा आवद्ध भएका छन्। रास्वपाले अघि सारेको परिवर्तनको अभियानलाई सघाउने उद्देश्यले पार्टी प्रवेश गरेको उनीहरूले बताएका छन्।

आइतबार जनकपुरधाम उपमहानगरपालिका–७ भ्रमरपुरा चोक र वडा नम्बर १ मा आयोजित पार्टी प्रवेश कार्यक्रममा पनि एक सयभन्दा बढी युवाहरू रास्वपामा प्रवेश गरेका छन्।

नवप्रवेशीहरूलाई रास्वपाका प्रवक्ता एवं धनुषा–३ का प्रतिनिधिसभा सदस्य उम्मेदवार मनिष झाले स्वागत गरेका थिए। कार्यक्रमलाई सम्बोधन गर्दै उनले रास्वपाले अघि सारेको परिवर्तनको अभियान जनस्तरसम्म पुगिरहेको दाबी गरे। युवाहरूमा देखिएको आकर्षणले परिवर्तनको अभियानलाई थप बल पुग्ने विश्वास उनले व्यक्त गरे।