जनकपुरधाम जेसिजको ५० औँ पदस्थापना तथा पुरस्कार वितरण समारोह भव्य रूपमा सम्पन्न

गिरिजानन्द साह/धनुषा/माघ १८ गते ।
जनकपुरधाम जेसिजको ५० औँ पदस्थापना तथा पुरस्कार वितरण समारोह भव्य रूपमा सम्पन्न भएको छ। कार्यक्रम जनकपुरधाम जेसिज वर्ष २०२५ का अध्यक्ष जेसि मुकेश कुमार साहको सभाध्यक्षतामा सुरु भई जेसिज वर्ष २०२६ का नव निर्वाचित अध्यक्ष जेसि भवेश झाको सभाध्यक्षतामा समापन भएको हो।

कार्यक्रमका क्रममा वर्ष २०२५ का अध्यक्ष जेसि मुकेश कुमार साहले वर्ष २०२६ का लागि अध्यक्ष पदमा निर्वाचित जेसि भवेश झालाई चाँदीको माला लगाइदिँदै औपचारिक रूपमा नेतृत्व हस्तान्तरण गरेका थिए।

समारोहका प्रमुख अतिथि जनकपुरधाम उपमहानगरपालिकाका मेयर मनोज कुमार साहले जनकपुरधाम जेसिज युवाहरूलाई नेतृत्व, अनुशासन र सामाजिक सेवामार्फत सक्षम बनाउँदै आएको उदाहरणीय संस्था भएको बताए। उनले भने,
“जेसिज जस्तो युवामुखी संस्थाले समाजमा सकारात्मक परिवर्तन ल्याउन महत्वपूर्ण भूमिका खेलिरहेको छ। युवामा नेतृत्व विकास भयो भने मात्र समाज र राष्ट्र समृद्धिको बाटोमा अघि बढ्छ।”
मेयर साहले जनकपुरधामको विकासमा युवाहरूको सक्रिय सहभागिता अपरिहार्य रहेको उल्लेख गर्दै नगरपालिकाले जेसिजसँग सहकार्य गर्दै सामाजिक, शैक्षिक तथा विकासात्मक अभियानहरू अघि बढाउन सदैव तत्पर रहने प्रतिबद्धता व्यक्त गरे।

कार्यक्रममा जनकपुरधाममा सम्पन्न ५२ औँ राष्ट्रिय महाधिवेशन सफल बनाउन योगदान दिएका महाधिवेशन कमिटीका सदस्यहरू तथा जेसिजका पूर्व अध्यक्षहरूलाई सम्मान गरिएको थियो। साथै वर्ष २०२५ लाई सफल बनाउन विभिन्न क्षेत्रमा योगदान पुर्‍याएका बोर्डका पदाधिकारी तथा सदस्यहरूलाई अध्यक्ष मुकेश साहले सम्मान गरेका थिए।

जेसिज वर्ष २०२६ का लागि अध्यक्षमा जेसि भवेश झा, कार्यकारी उपाध्यक्षमा जेसि राम सोगारथ साह र जेसि अमरेन्द्र साह, उपाध्यक्षमा जेसि नवीन कुमार झा, जेसि कैलाश नारायण साह, जेसि विनय कुमार साह र जेसि सुरेश निर्विरोध निर्वाचित भएका छन्। महासचिवमा जेसि मनोहर ठाकुर, कोषाध्यक्षमा जितेन्द्र साह तथा कानूनी सल्लाहकारमा जेसि दिपक यादव चयन भएका छन्। कार्यक्रममा वर्ष २०२६ का सम्पूर्ण पदाधिकारीहरूले सपथग्रहण गरेका थिए।

सभा अध्यक्ष तथा वर्ष २०२५ का अध्यक्ष जेसि मुकेश कुमार साहले आफ्नो कार्यकालमा प्राप्त सहयोगप्रति धन्यवाद व्यक्त गर्दै सदस्यहरूको एकता, सहकार्य र समर्पणकै कारण जनकपुरधाम जेसिजको गरिमा अझ उचाइमा पुगेको बताए। उनले आगामी नेतृत्वप्रति शुभकामना व्यक्त गर्दै संस्थालाई अझ प्रभावकारी बनाउने विश्वास व्यक्त गरे।

त्यसैगरी नव निर्वाचित अध्यक्ष जेसि भवेश झाले जिम्मेवारीप्रति प्रतिबद्धता जनाउँदै जनकपुरधाम जेसिजलाई सेवा, नेतृत्व र सकारात्मक परिवर्तनको नमुना संस्थाका रूपमा स्थापित गर्ने लक्ष्य रहेको बताए। उनले अघिल्ला अध्यक्ष तथा सदस्यहरूको अनुभव र मार्गदर्शनलाई आत्मसात गर्दै युवामुखी तथा समाजोपयोगी कार्यक्रमहरू अघि बढाउने प्रतिबद्धता व्यक्त गरे।

कार्यक्रमको सञ्चालन जनकपुरधाम जेसिजका पूर्व अध्यक्ष जेसि राजु कुमार साहले गरेका थिए। कार्यक्रममा विशिष्ट अतिथिमा जनकपुरधाम उद्योग वाणिज्य संघका अध्यक्ष सुरेन्द्र भण्डारी रहेका थिए भने नेपाल पत्रकार महासंघ धनुषा शाखाका अध्यक्ष पुरन साहलगायत जेसिजका पूर्व अध्यक्षहरू, सदस्यहरू, आजीवन सदस्यहरू, पत्रकार तथा विभिन्न संघ–संस्थाका प्रतिनिधिहरूको उल्लेख्य सहभागिता रहेको थियो।