जनकपुरधाम स्थित सुनैना आँखा अस्पताल र लक्ष्मीनिया गाउँपालिकाको सहकार्यमा ११० जनाको नि:शुल्क मोतियाबिन्दु शल्यक्रिया

जनकपुरधाम/गिरिजानन्द साह/पुस २८ गते । जनकपुरधामको कदमचोक स्थित सुनैना आँखा अस्पताल र धनुषाको लक्ष्मीनिया गाउँपालिकाको सहकार्यमा सञ्चालन गरिएको नि:शुल्क आँखा शिविर सफलतापूर्वक सम्पन्न भएको छ। लक्ष्मीनिया गाउँपालिकाका वडा नं.–१ देखि वडा नं.–७ सम्मका सबै वडामा आयोजना गरिएको उक्त शिविरबाट १ हजार १ सय भन्दा बढी स्थानीय बासिन्दाले आँखा परीक्षण गराएका छन्।

शिविरमा गरिएका परीक्षणका क्रममा २५० जनामा मोतियाबिन्दुको समस्या देखिएको छ भने ३० जनामा आँखाको नानीमा मासु पलाउने समस्या पहिचान भएको छ। पहिचान भएका मोतियाबिन्दुका बिरामीहरूमध्ये ११० जनाको सुनैना आँखा अस्पतालमा नि:शुल्क शल्यक्रिया गरिएको अस्पतालले जनाएको छ।

शल्यक्रिया गरिएका सबै बिरामीलाई अस्पतालले निःशुल्क खानपान, बसोबास तथा आवश्यक औषधि समेत उपलब्ध गराएको छ। साथै बिरामीहरूलाई अस्पतालसम्म ल्याउने र उपचार पश्चात् पुनः घर फर्काउने सम्पूर्ण यातायात खर्च लक्ष्मीनिया गाउँपालिकाले व्यहोरेको गाउँपालिकाले जनाएको छ।

ग्रामीण तथा आर्थिक रूपमा कमजोर वर्गका नागरिकहरूलाई लक्षित गरी आयोजना गरिएको यो शिविरले आँखा उपचारबाट वञ्चित धेरै नागरिकलाई प्रत्यक्ष राहत पुगेको स्थानीयवासीहरूले बताएका छन्। समयमै उपचार नपाउँदा दृष्टि गुमाउने जोखिममा रहेका बिरामीहरूका लागि यो शिविर अत्यन्तै उपयोगी सावित भएको उनीहरूको भनाइ छ।

सुनैना आँखा अस्पताल निजी अस्पताल भए पनि स्थापना कालदेखि नै न्यूनतम शुल्कमा सेवा दिँदै आएको अस्पताल प्रशासनले जानकारी दिएको छ। अस्पतालले आँखा जाँच शुल्क मात्र ५० रुपैयाँ लिँदै आएको छ। साथै, अनुभवी नेत्र रोग विशेषज्ञहरूद्वारा परीक्षण, अत्याधुनिक प्रविधियुक्त उपकरणमार्फत उपचार तथा गुणस्तरीय सेवाका कारण अस्पतालले छोटो समयमा नै नागरिकको विश्वास जित्न सफल भएको जनाएको छ। स्वास्थ्य क्षेत्रमा स्थानीय सरकार र निजी क्षेत्रबीचको सहकार्यले समुदायस्तरमा सकारात्मक परिवर्तन ल्याउन सकिने उदाहरणका रूपमा यो शिविरलाई लिइएको छ।