शहीद पत्रकार उमा सिंहको १७औँ स्मृति दिवसमा नि : शुल्क स्वास्थ्य परीक्षण कार्यक्रम र श्रद्धाञ्जली सभा

जनकपुरधाम/पुस २७ गते। नेपाल पत्रकार महासंघ धनुषाले शहीद पत्रकार उमा सिंहको १७औँ स्मृति दिवसको अवसरमा नि:शुल्क स्वास्थ्य परीक्षण कार्यक्रम तथा श्रद्धाञ्जली सभा आयोजना गरेको छ।

वि.सं. २०६५ साल पुस २७ गते जनकपुरधाम उपमहानगरपालिका–४ रजौलस्थित आफ्नै डेरामा रहेका बेला एक समूहले उमा सिंहमाथि विभत्स आक्रमण गरेको थियो। अज्ञात समूहको आक्रमणबाट गम्भीर घाइते भएकी सिंहलाई उपचारका लागि जनकपुरधाम उपमहानगरपालिका–१ मिल्स एरियास्थित केयर मेडिकलमा भर्ना गरिएको थियो। तर उपचार सम्भव नभएपछि थप उपचारका लागि काठमाडौँ लैजाने क्रममा बाटोमै उनको निधन भएको थियो।

शहीद पत्रकार सिंहको स्मृतिमा आयोजित कार्यक्रममा सहभागी संचारकर्मीहरूले मधेस प्रदेशमा अझै पनि पत्रकारहरू सुरक्षित महसुस गर्न नसकेको गुनासो व्यक्त गरे। उनीहरूले पत्रकारको सुरक्षाका लागि राज्यले प्रभावकारी भूमिका निर्वाह गर्नुपर्ने आवश्यकता औंल्याए।

श्रद्धाञ्जली सभामा नेपाल पत्रकार महासंघ मधेस प्रदेशका अध्यक्ष श्याम बञ्जारा, लेखा समितिका संयोजक केसी लामिछाने, नेपाल पत्रकार महासंघ धनुषाका अध्यक्ष पुरन साह, मधेस प्रदेशका अध्यक्ष शैलेन्द्र महतो, केन्द्रीय सदस्य राजेश कर्ण, नेपाल पत्रकार महासंघ धनुषाका पूर्व अध्यक्षद्वय अशोक रौनियार र मनिका झा, वरिष्ठ पत्रकार रामभरत साहलगायतको उपस्थिति रहेको थियो।

यसअघि स्मृति दिवसको अवसर पारेर नेपाल पत्रकार महासंघ धनुषा शाखाले संचारकर्मीहरूका लागि नि:शुल्क स्वास्थ्य परीक्षण कार्यक्रम सञ्चालन गरेको थियो। उक्त कार्यक्रममा ५० जना संचारकर्मीहरूले स्वास्थ्य परीक्षण गराएको नेपाल पत्रकार महासंघ धनुषाले जनाएको छ।

कार्यक्रमका वक्ताहरूले शहीद पत्रकार उमा सिंहको बलिदानलाई स्मरण गर्दै प्रेस स्वतन्त्रता, पत्रकार सुरक्षा र न्याय सुनिश्चित गर्न राज्य अझ जिम्मेवार बन्नुपर्नेमा जोड दिएका थिए।