जानकी महिला जागरण समाजको सामाजिक परीक्षण कार्यक्रम सम्पन्न

जनकपुरधाम । जनकपुरधाममा लामो समयदेखि क्रियाशील सामाजिक संस्था जानकी महिला जागरण समाजको सामाजिक परीक्षण कार्यक्रम एक विशेष समारोहका बीच सम्पन्न भएको छ । मधेश प्रदेशका धनुषा, सर्लाही, रौतहट, पर्सा, सिरहा र सप्तरी जिल्लामा संस्थाले सञ्चालन गर्दै आएका विभिन्न कार्यक्रमहरूको मूल्यांकन तथा समीक्षा सो अवसरमा गरिएको थियो ।

कार्यक्रममा जनकपुरधाम उपमहानगरपालिकाका मेयर मनोज साहले संस्थाको कार्यप्रति उच्च प्रशंसा गर्दै भने, “जानकी महिलाको काम हेर्दा म सयमा सय अंक दिन चाहन्छु । हाम्रो साझा लक्ष्य गरीबी अन्त्य गर्नु हो, त्यसका लागि नगरपालिका र संस्था मिलेर काम गर्न तयार छौँ।”

त्यस्तै, जिल्ला समन्वय समिति धनुषाका अध्यक्ष राजनन्दन मण्डलले संस्थाको स्थापना इतिहास स्मरण गर्दै भने, “जानकी महिला जागरण समाजले सुरुदेखिनै जनचेतना र सामाजिक रूपान्तरणमा उत्कृष्ट योगदान दिँदै आएको छ ।” उनले एनजिओहरूले स्वदेशमै रोजगारी र आत्मनिर्भरता बढाउने कार्यक्रमलाई प्राथमिकता दिनुपर्नेमा जोड दिए ।

कमला नगरपालिकाका मेयर विश्वेश्वर यादवले महिलाको सशक्तिकरण र आर्थिक उन्नतिका क्षेत्रमा संस्थाले गरेको योगदान उल्लेखनीय रहेको बताए । गणेशमान चारनाथ नगरपालिकाका मेयर जीतनारायण यादवले शिक्षा, स्वास्थ्य र रोजगारीका क्षेत्रमा संस्थाको भूमिका प्रशंसनीय रहेको भन्दै “म पनि जानकी महिलालाई सयमा सय अंक दिन्छु” भने ।

कार्यक्रममा संस्थाकी अध्यक्ष मन्दाकिनी कर्णको अध्यक्षता थियो । सो अवसरमा जिल्ला समन्वय समिति धनुषाका उप–संयोजक, विभिन्न पालिकाका प्रमुख–उपप्रमुखहरू, सरकारी कार्यालयका प्रतिनिधिहरू, साझेदार संस्था, पत्रकार, परियोजनाका लाभग्राही तथा कर्मचारीहरूको उल्लेखनीय उपस्थिति थियो ।

कार्यक्रममा आर्थिक वर्ष २०८१/०८२ मा सञ्चालित परियोजनाहरूको प्रगति, खर्च विवरण र प्राप्त उपलब्धिहरू प्रस्तुत गरिएका थिए । सहभागीहरूले प्रदर्शनी ग्यालरीमार्फत उपलब्धिहरू अवलोकन गर्दै परियोजना टोलीसँग प्रत्यक्ष संवाद गरी आफ्ना सुझाव र अनुभवहरू आदान–प्रदान गरेका थिए ।

यस सामाजिक परीक्षण कार्यक्रममार्फत संस्थाले आफ्नो कार्यदिशा, पारदर्शिता र प्रभावकारिता दुवै प्रमाणित गरेको सरोकारवालाहरूको निष्कर्ष रहेको छ ।