जसपा नेपालका अध्यक्ष उपेन्द्र यादवलाई समयमै निर्वाचन हुनेमा आशंका

जनकपुरधाम/असोज २७ गते । जनता समाजवादी पार्टी (जसपा) नेपालका अध्यक्ष उपेन्द्र यादवले अहिलेको अवस्थामै फागुन २१ गते निर्धारित निर्वाचन हुनेमा शंका व्यक्त गरेका छन् । जसपा नेपालको मधेश प्रदेश अधिवेशनको उद्घाटन सत्रलाई सोमबार सम्बोधन गर्दै अध्यक्ष यादवले अन्तरिम सरकारले निर्वाचन गराउन सक्ने वातावरण बनाउन नसकेको आरोप लगाए ।

उनका अनुसार, निर्वाचनका लागि ६ महिनाको समयावधि दिएर गठन गरिएको अन्तरिम सरकारको एक महिना बितिसक्दा पनि उसले कुनै ठोस काम अगाडि बढाउन सकेको छैन । यादवले भने, “अन्तरिम सरकारले अहिलेसम्म हामीसँग निर्वाचन केन्द्रित छलफल गरेको छैन । राजनीतिक दलहरूको सहभागिता र सहमति बिना निर्वाचन सम्भव छैन ।”

अध्यक्ष यादवले तत्कालीन राजा ज्ञानेन्द्रले राजनीतिक दलविना चुनाव गराएको उदाहरण दिँदै अहिलेको सरकार पनि त्यस्तै बाटोमा हिँड्दै गएको बताए । उनले चेतावनी दिँदै भने, “राजनीतिक दलसँग छलफल नगरी गरिएको चुनाव परिणाममुखी हुँदैन ।”

संघीयता खारेज गर्ने षड्यन्त्र भइरहेको दाबी गर्दै यादवले त्यसविरुद्ध जसपा नेपाल सधैं खडा रहने स्पष्ट सन्देश दिए । “संघीय गणतन्त्रात्मक व्यवस्थालाई समाप्त पार्ने खेल भए त्यसविरुद्ध हामी चुप लाग्नेछैनौं,” उनले भने, “अब कसरी संघीय गणतन्त्रलाई अझ मजबुत बनाउन सकिन्छ, त्यस तर्फ सबैले सोच्नुपर्छ ।”

यादवले कांग्रेस र कम्युनिष्ट दलहरूले वर्षौं सरकार चलाए पनि देशमा खासै विकास गर्न नसकेको आरोप लगाए । उनले भने, “देशले कुनै क्षेत्रमा विकास गरेन, तर भ्रष्टाचार मात्रै त्यो क्षेत्र हो जहाँ तीव्र विकास भयो । यही कारणले युवाहरूमा आक्रोश बढ्दै आन्दोलनको रूपमा देखा परेको छ ।”

देशलाई सही दिशामा लैजान प्रत्यक्ष निर्वाचित कार्यकारी राष्ट्रपति र समानुपातिक प्रतिनिधित्व आधारित निर्वाचन प्रणाली आजको आवश्यकता भएको यादवको भनाइ थियो ।

उनले संघीय गणतन्त्रात्मक व्यवस्थालाई जोगाउँदै संविधान पुनर्लेखन, प्रदेशहरूको पुनःसंरचना, प्रदेशलाई अधिकार सम्पन्न बनाउने र स्थानीय तहमा दलगत प्रतिस्पर्धा अन्त्य गरी त्यसलाई प्रदेश मातहत ल्याउने माग पनि राखे ।