जनकपुरधाममा दशै सस्ता बजार सुरु

जनकपुरधाम। दशैँको अवसरमा जनकपुरधाम उद्योग वाणिज्य संघको आयोजनामा हरेक वर्षझैँ यस वर्ष पनि दशै सस्ता बजार सुरु भएको छ। जनकपुरधामको रामचोकस्थित गोपाल धर्मशालामा सञ्चालनमा आएको यो बजार एक सातासम्म चल्नेछ।

दशैँ सस्ता बजारको उद्घाटन राममन्दिरका महन्थ राम गिरीले गर्नुभएको छ । हिजोबाट सुरु भएको बजार आगामी महाअष्टमीसम्म सञ्चालनमा रहने जनकपुरधाम उद्योग वाणिज्य संघका अध्यक्ष सुरेन्द्र भण्डारीले जानकारी दिनुभयो।

उहाँका अनुसार बजारमा भित्र र बाहिर गरी करिब १०० भन्दा बढी स्टल राखिएका छन्। बजारमा खाद्यान्न, दैनिक उपभोग्य सामग्री, लत्ता कपडा, साबुन, सर्फ, अगरबत्ती, प्लास्टिकका भाँडा लगायतका सामग्रीको बिक्री भइरहेको छ। यस बजारलाई उपभोक्ताले वर्षभरिका लागि आवश्यक सामान खरिद गर्ने अवसरका रूपमा लिने गरेका छन्। यस्तै, मेलामा स्थानीय, राष्ट्रिय तथा अन्तर्राष्ट्रिय स्तरमा उत्पादन भएका वस्तुहरू बिक्रीका लागि राखिएका छन्।

उद्घाटन कार्यक्रममा जनकपुरधामका नगरप्रमुख मनोजकुमार साह, नेपाल पत्रकार महासंघ धनुषाका अध्यक्ष पुरन साह, पूर्व नगरप्रमुख बजरंग प्रसाद साह,ई. प्रकाश चन्द्र साह, निर्मल चौधरी, रमेश साह, श्याम प्रसाद साह लगायतको उपस्थिति रहेको थियो।