जनकपुरधाम/भदौ २० गते । जनकपुरधाममा चारदिने अन्तर्राष्ट्रिय औद्योगिक मेला हुने भएको छ। मधेश प्रदेशमा औद्योगिक गतिविधिको प्रवर्द्धन गर्ने उद्देश्यसहित अन्तर्राष्ट्रिय औद्योगिक मेला हुन लागेको हो।
आयोजकको अनुसार आगामी कार्तिक २७ देखि ३० गतेसम्म जनकपुरधामको तिरहुतिया गाछीमा आयोजना हुने मेलाको तयारी पूरा भईसकेको छ।
मधेश प्रदेश उद्योग परिसंघ, सिया इभेन्ट्स र ग्लोब टेक इन्डियाको संयुक्त आयोजनामा हुने “अन्तर्राष्ट्रिय औद्योगिक मेला २०२५” मा करिब १४० स्टल रहनेछन्। मेलामा भारत, बङ्गलादेशलगायतका मुलुकका उद्योगी, व्यवसायी सहभागी हुनेछन्।
मेलामा अटोमोबाइल, कृषि उपकरण तथा विविध औद्योगिक उत्पादनको प्रदर्शनी गरिनेछ। मधेश उद्योग परिसंघका अध्यक्ष प्रमोद साहका अनुसार मेलाले उद्योग, कृषि र अटोमोबाइल क्षेत्रलाई एउटै मञ्चमा ल्याई नेटवर्किङ, सहकार्य र नवीनतम प्रविधिको आदानप्रदान गर्न सहयोग गर्नेछ।
साहले मेलाबाट मधेश प्रदेशका उद्योगी, व्यवसायी र कृषकलाई नयाँ बजार तथा प्रविधिसँग परिचित गराउने र प्रदेशको औद्योगिक विकासमा टेवा पुर्याउने अपेक्षा गरिएको बताए।
Discussion about this post