भदौ २७ गते रिलिज हुने चलचित्र ‘अभिमन्यु’ को प्रमोशन टीम जनकपुरधाममा

भदौ १७ गते। भदौ २७ गते रिलिज हुन लागेको चलचित्र ‘अभिमन्यु’ को प्रोमोशन को लागि चलचित्र टीम जनकपुरधाम आई पुगेको छ । चलचित्र टीमले आज जनकपुरधाममा पत्रकार सम्मेलनको आयोजना गरेर फिल्मको बारेमा जानकारी गराएको छ। पत्रकार सम्मेलनमा ‘अभिमन्यु’का मुख्य कलाकार द्वय कामेश्वर चौसासिया र किरण श्रेष्ठ सहभागी रहेको थियो ।

उनीहरूले दर्शकले रुचाउने खालको चलचित्र बनेको भन्दै हेरेर जस्तो लाग्छ त्यस्तै प्रतिक्रिया दिन आग्रह गरेका छन् ।

चलचित्र ‘अभिमन्यु’ भदौ २७ गते रिलिज हुँदैछ । यो चलचित्रको हिन्दी भर्सन असोज ६ अर्थात् (सेप्टेम्बर २२) मा रिलिज हुने निर्माण पक्षले जनाएको छ । हिन्दी भर्सन पनि वल्र्डवाइड रिलिज हुनेछ । चलचित्रले पैसाको प्रलोभनमा चक्रव्यूहमा फस्ने र त्यहाँबाट उम्किन खोज्ने व्यक्तिको संघर्षको कथा भन्नेछ ।

चलचित्र ‘अभिमन्यु’मा कामेश्वर चौरासिया, सरिता गिरी, गौमाया गुरुङ, लक्ष्मी बर्देबा, शिशिर वाङ्देल, किरण श्रेष्ठ, प्रकाश दाहाल, सुष्मा निरौलालगायतको अभिनय छ । सेभेन सिज सिनेमाको प्रस्तुति निर्माण भएको सिनेमा ‘अभिमन्यु’लाई सुशान्त गौतमले निर्देशन गरेका छन् । मुकेश खनालको लेखन रहेको चलचित्रको क्रिएटिभ निर्देशक मदन थापा हुन् ।

‘अभिमन्यु’का निर्माता विनोद पौडेल र गुञ्जन गिरी हुन् । रमेश चौलागाईं र हरि श्रेष्ठ सह–निर्माता रहेको चलचित्रका कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् ।

जीवन शाक्य लाइन प्रोड्युसर रहेको यस चलचित्रमा मनोज श्रेष्ठ भिएफएक्स, सुप्रिम पराजुली रंग सम्योजन, मदन घिमिरे सम्पादक रहेका छन् । ‘अभिमन्यु’मा शरद महतोको डिओपी रहेको छ ।