मधेसी समुदायमाथि अझै भेदभाव कायम छ : उपेन्द्र यादव

जनकपुरधाम/भदौ १४ गते । जनता समाजवादी पार्टी (जसपा) नेपालका अध्यक्ष उपेन्द्र यादवले मधेसी समुदायमाथि भेदभाव अझै कायमै रहेको बताएका छन् । उनले मधेसी समुदायमाथिको भेदभाव अन्त्य नगरी मुलुकमा समृद्ध समाज निर्माण सम्भव नहुने स्पष्ट पारेका छन् ।

शनिबार जनकपुरधाममा आयोजित मधेसी स्वास्थ्यकर्मी फोरम नेपालको दोस्रो प्रदेश महाधिवेशनलाई सम्बोधन गर्दै अध्यक्ष यादवले मधेसप्रति राज्यको व्यवहार अझै पनि भेदभावपूर्ण रहेको आरोप लगाए । उनले मधेसलाई आर्थिक दृष्टिले कमजोर बनाइराखिएको र राज्यका विभिन्न निकायमा मधेसीहरूको प्रतिनिधित्व न्यून देखिनु गम्भीर विषय भएको उल्लेख गरे ।

यादवले मुलुकको कुल जनसंख्यामध्ये आधाभन्दा बढी मधेसी रहेको भए पनि उनीहरूको सहभागिता र समावेशीतामा न्यूनतम स्थान दिएको बताए । उनले भने, “प्रतिनिधि सभामा केही हदसम्म प्रतिनिधित्व भए पनि राष्ट्रिय सभामा ५९ सदस्य मध्ये जम्मा ६ जना मात्र मधेसी छन् । यसले अझै पनि राज्यको भेदभावपूर्ण दृष्टिकोण झल्काउँछ ।”

जसपा अध्यक्ष यादवले मधेसी समुदायलाई अधिकार, समानता र अवसरबाट अलग्याएर देश विकासको सपना पुरा नहुनेमा जोड दिए । उनले मधेसलाई आर्थिक, सामाजिक र राजनीतिक रूपमा सशक्त बनाउन राज्यको व्यवहार बदलिनु जरुरी भएको बताए । सम्बोधनको अन्त्यमा उनले मधेसी समुदायका विभिन्न क्षेत्रका प्रतिनिधिहरूलाई अधिकार सुनिश्चितता र समावेशी समाज निर्माणका लागि एकजुट भएर आवाज उठाउन आग्रह गरे ।