गिरिजानन्द साह/जनकपुरधाम/भदौ ७ गते । लायन्स क्लब अफ जनकपुरधाम, लायन्स क्लब अफ जनकपुरधाम गार्गी र लियो क्लब अफ जनकपुरको संयुक्त आयोजनामा जनकपुरधाममा भव्य मेहेन्दी प्रतियोगिता सम्पन्न भएको छ। कार्यक्रमले स्थानीय विद्यार्थी युवतीहरूलाई आफ्नो सिर्जनशीलता र प्रतिभा प्रदर्शन गर्ने अवसर दिएको आयोजकले बताएका छन्।
कार्यक्रमको अध्यक्षता लियो क्लब अफ जनकपुरधामका अध्यक्ष लियो ओम कापरीले गरेका थिए भने प्रतियोगिताको संयोजन लियो सफिक अहमदले गरेका थिए। प्रतियोगितामा लियो क्लब अफ जनकपुर मोनास्टिकको सहयोग रहेको थियो। मेहेन्दी प्रतियोगिताका प्रमुख अतिथि लायन रामबाबु गुप्ता रहेका थिए।
प्रतियोगितामा जनकपुरधामका विभिन्न विद्यालयका छात्राहरूको सक्रिय सहभागिता रहेको थियो। प्रतिस्पर्धात्मक वातावरणबीच लभली पब्लिक स्कुलकी आस्मा खातुन प्रथम स्थान हासिल गर्दै विजेता घोषित भइन्। त्यस्तै आसिका साह द्वितीय र डोली खडका तृतीय भएका छन्। विजेता विद्यार्थीलाई प्रमाणपत्र र मेडल प्रदान गरिएको थियो भने अन्य सबै सहभागीलाई पनि प्रमाणपत्र वितरण गरिएको लियो क्लब अफ जनकपुरधामको अध्यक्ष ओम कापरीले बताए।
प्रतियोगितामा सहभागी प्रतिस्पर्धीहरूले विभिन्न डिजाईन र शैलीका आकर्षक मेहेन्दी प्रस्तुत गरेका थिए, जसले दर्शकहरूलाई समेत मोहनीमा पारेको थियो। आयोजकहरूका अनुसार यस किसिमका कार्यक्रमहरूले युवाहरूमाझ सिर्जनात्मकता, आत्मविश्वास र सांस्कृतिक चाडपर्वप्रतिको लगावलाई अझ बढाउने विश्वास लिइएको छ।
कार्यक्रममा मोनास्टिक स्कुल र कलेजका निर्देशक सोनु साह, लायन रामबाबु साह, लायन्स क्लब अफ जनकपुरधामका पूर्व अध्यक्ष लायन प्रभात साह, लियो क्लब अफ जनकपुरधामका सेकेन्ड भि.पी. लियो प्रविन कुमार महतो, लायन्स क्लब अफ जनकपुरधाम गार्गीकी अध्यक्ष सुजाता कुमारी साह, सचिव सरिता साह, लियो क्लब अफ जनकपुर मोनास्टिकका लियो अनुराग साह, लियो विवेक कुमार झा, लियो आकृती सिंह राजपुतलगायत लायन्स तथा लियो क्लबका पदाधिकारीहरूको विशेष उपस्थिति रहेको थियो।
Discussion about this post