काठमाडौँ/भदौ २ गते । सर्वोच्च अदालतले बहुचर्चित गौर हत्याकाण्डमा छानबिन अघि बढाउन आदेश दिएको छ ।
न्यायाधीशद्वय तिलप्रसाद श्रेष्ठ र नित्यानन्द पाण्डेयको संयुक्त इजलासले सोमबार उक्त हत्याकाण्डमा छानबिनको काम अघि बढाउन आदेश दिएको हो ।त्रिभुवन शाहलगायतले गौरहत्याकाण्डबारे छानबिन गरी कारबाही हुनुपर्ने माग राखेर सर्वोच्च अदालतमा निवेदन दिएका थिए । २०६३ चैत ७ गते रौतहटको गौरस्थित राइस मिलको चौरमा भएको आक्रमणमा माओवादीका २७ जना कार्यकर्ता मारिएका थिए भने सयभन्दा बढी घाइते भएका थिए । त्यो दिन मधेशी जनअधिकार फोरम र माओवादीको मधेशी मुक्ति मोर्चाले एकै दिन उही समयमा छुट्टाछुट्टै कार्यक्रम आयोजना गरेका थिए ।
फोरमले कार्यक्रमको तिथि घोषणा गरेपछि मधेशी मुक्ति मोर्चाले समेत सोही दिन सोही स्थानमा कार्यक्रम गर्ने घोषणा गरेको थियो । जिल्ला प्रशासन कार्यालयले दुवै पक्षलाई एकै दिन कार्यक्रम नगर्न बरु एकदिन अघि–पछि गर्न अनुरोध गरेको थियो, फोरमले आफु पहिले घोषणा गरेकोले त्यही दिन गर्ने अडान लिएका थिए भने मोर्चाले पनि त्यही दिन कार्यक्रम गर्ने अडान लिएका थिए । कार्यक्रममा दुवैतर्फका कार्यकर्ता आउने क्रम बढ्दै गएपछि विवाद भएको थियो ।
मधेशी मुक्ति मोर्चाको तर्फ बाट पहिले गोली प्रहार भएपछि झडप उग्ररुप लिएको थियो । मोर्चाको प्रतिकारमा फोरमका कार्यकर्ता सहित स्थानीयवासीहरु उत्रिए पछि मोर्चा तर्फ ठूलो क्षति हुन गएको थियो ।
Discussion about this post