माननीय जुलि महतोद्वारा जनकपुरधामको शहरीकरणका लागि वडाहरू १२, १५ र १६ जोड्ने कालोपत्रे सडकको शिलान्यास

गिरिजानन्द साह/जनकपुरधाम/साउन २० गते। जनकपुरधामको समुन्नत शहरीकरण र यातायात पूर्वाधार विकासलाई प्राथमिकता दिँदै प्रतिनिधिसभा सदस्य माननीय जुलि महतोद्वारा आज वडाहरू १२, १५ र १६ लाई जोड्ने अति आवश्यक कालोपत्रे सडक निर्माण कार्यको शिलान्यास गरिएको छ।

शहरी विकास मन्त्रालयमार्फत बजेट विनियोजन गराई उक्त सडक योजना अघि बढाइएको हो। उक्त योजना अन्तर्गत जनकपुरधाम उपमहानगरपालिका वडा नं. १६ स्थित कपिलेश्वर, वडा नं. १२ स्थित कुवा र वडा नं. १५ स्थित रामपुर क्षेत्रलाई आपसमा सँगै जोड्ने कालोपत्रे सडक निर्माण गरिनेछ।

शिलान्यास कार्यक्रममा बोल्दै माननीय महतोले भनिन्, “जनता र जनकपुरधामको आवश्यकता बुझ्दै मैले शहरी विकास मन्त्रालयमार्फत बजेट ल्याई यो महत्वाकांक्षी योजना सुरु गरेकी हुँ। अब जनकपुरधाममा आधुनिक, सुगम र व्यवस्थित सडक सञ्जाल विस्तार गरिनेछ।”

उनले थप भनिन् कि यो सडकले केवल यातायात मात्र होइन, आर्थिक, सामाजिक तथा अन्य पूर्वाधार विकासलाई समेत प्रवाह गर्नेछ।

स्थानीय जनप्रतिनिधि तथा बासिन्दाहरूले पनि यस विकास योजनाको स्वागत गर्दै धन्यवाद व्यक्त गरेका छन्। उनीहरूले निर्माण कार्य गुणस्तरीय र समयमै सम्पन्न गर्न माग गरेका छन्।

यस सडकले मुख्य रूपमा जनकपुरधामको दक्षिणी क्षेत्रलाई केन्द्रविन्दुमा राख्दै आवागमन सहज बनाउनेछ, जसले सर्वसाधारण, विद्यार्थी, व्यवसायी तथा आपतकालीन सेवाहरूका लागि सहजता ल्याउने अपेक्षा गरिएको छ।

यस अवसरमा जनकपुरधाम उपमहानगरपालिकाका पदाधिकारीहरू, राजनीतिक दलका प्रतिनिधिहरू, स्थानीय समाजसेवीहरू तथा स्थानीय बासिन्दाहरूको उल्लेख्य उपस्थिति रहेको थियो।