सप्तरीमा खैरो हिरोइनसहित दुई पक्राउ, भाग्न खोज्दा प्रहरीले गर्‍यो हवाई फायर

सप्तरी/साउन १८ गते। प्रतिबन्धित लागुऔषध खैरो हिरोइन बोकेर मोटरसाइकलमा भाग्न खोजेका दुई जनालाई प्रहरीले आइतबार बिहान हवाई फायर गर्दै नियन्त्रणमा लिएको छ।

जिल्लाको छिन्नमस्ता गाउँपालिका–१ बरहीविरपुरका २९ वर्षे बिशाल राय र डाक्नेश्वरी नगरपालिका–७ मझौराका ३९ वर्षे मनोज राय पक्राउ परेका हुन्। लागुऔषध नियन्त्रण ब्युरो, काठमाडौं र जिल्ला प्रहरी कार्यालय (जप्रका) सप्तरीको संयुक्त टोलीले राजविराज–छिन्नमस्ता सडकखण्डबाट उनीहरूलाई नियन्त्रणमा लिएको हो।

जप्रका सप्तरीका प्रवक्ता प्रहरी नायब उपरीक्षक (डीएसपी) जीतेन्द्र कुमार वस्नेतका अनुसार १७७ ग्राम खैरो हिरोइन र दुई थान मोबाइल फोन बरामद गरिएको छ। “गोप्य सूचनाका आधारमा चेकजाँच सुरु गर्दा उनीहरू स.८प ८२२५ नम्बरको मोटरसाइकलमै भाग्न खोजेका थिए,” वस्नेतले भने, “स्थिति नियन्त्रणमा लिन दुई राउन्ड हवाई फायर गरिएको थियो।”

प्रारम्भिक बयानअनुसार हिरोइनलाई पूर्वी नाकाबाट भित्र्याइ प्रदेशका विभिन्न क्षेत्रमा बिक्री गर्ने योजनामा उनीहरू रहेको हुन सक्ने प्रहरीको अनुमान छ।

प्रहरीले क्षेत्रीय सुरक्षा कडाइसँगै लागू औषध कारोबारमा संलग्न समूहको पहिचान र नियन्त्रणका लागि विशेष अभियान तीव्र बनाएको जनाएको छ। पक्राउ परेका दुवै जनामाथि लागू औषधसम्बन्धी कसूरमा अनुसन्धान भइरहेको प्रहरीले जनाएको छ।