जनकपुरधाम आलु प्याज व्यवसायी संघको शपथग्रहण सम्पन्न, व्यवसाय सुधारमा जोड

गिरिजानन्द साह/जनकपुरधाम?साउन १७ गते। जनकपुरधाम आलु प्याज व्यवसायी संघका नवनिर्वाचित पदाधिकारीहरुको शपथग्रहण कार्यक्रम एक समारोहका बीच सम्पन्न भएको छ।

संघका नवनिर्वाचित अध्यक्ष सुरज साह, सचिव मनोज साह, सह-सचिव संजय साह, कोषाध्यक्ष सिकेन्द्र साह लगायत पदाधिकारीहरुले अध्यक्ष मो. अलाउदीन राईनको उपस्थितिमा पद तथा गोपनीयताको शपथ लिएका हुन्।

कार्यक्रममा प्रमुख अतिथि रुपमा सहभागी नेकपा एमाले नेतृ एवं पूर्वमन्त्री जुली महतोले सीमापार किनमेल प्रवृत्तिका कारण जनकपुरधामको बजार व्यवसाय धराशायी हुँदै गएकोप्रति चिन्ता व्यक्त गरिन्। उनले मधेस प्रदेशको राजधानी जनकपुरधामको आर्थिक मेरुदण्ड संरक्षण गर्नु सरकारको कर्तव्य भएको उल्लेख गर्दै व्यापारीहरुलाई अनुदान, सहुलियत र प्रोत्साहनमार्फत बजार सुदृढ गर्नुपर्ने आवश्यकता औंल्याइन्।

साथै, हालको खडेरीका कारण सम्भावित धान उत्पादन गिरावटलाई मध्यनजर गर्दै महतोले उपभोग्य खाद्यवस्तुमा आत्मनिर्भर बन्न आलु प्याज व्यवसायीहरुले अग्रसरता लिनुपर्नेमा जोड दिइन्।

कार्यक्रममा जनकपुरधाम उद्योग वाणिज्य संघका अध्यक्ष सुरेन्द्र भण्डारीले व्यापारीहरुको सुखदुःखमा साथ रहने प्रतिबद्धता जनाउँदै बजार व्यवसाय उकास्न सरकारको सक्रिय भूमिका अपरिहार्य रहेको धारणा राखे।

शपथग्रहणपछिको मन्तव्यमा संघका अध्यक्ष सुरज साहले आलु प्याज व्यवसायलाई व्यवस्थित बनाउने र मूल्यमा एकरुपता ल्याउने दिशामा संघ अग्रसर हुने प्रतिबद्धता व्यक्त गरे। कार्यक्रममा विभिन्न व्यापारी, समाजसेवी तथा सरोकारवाला व्यक्तिहरुको उपस्थिति रहेको थियो।