जनकपुर न्यूरो अस्पतालद्वारा बालकको मृत्यु प्रकरणमा स्पष्टीकरण,आरोपको खण्डन

जनकपुरधाम/साउन ६ गते। धनुषाका बालक आयुष साहको उपचारका क्रममा मृत्यु भएपछि आलोचनाको केन्द्र बनेको जनकपुर न्यूरो अस्पतालले मंगलबार पत्रकार सम्मेलन गरी आफ्नाे पक्ष स्पष्ट गर्दै आरोपहरूको खण्डन  गरेको छ।

अस्पतालका सञ्चालक विजय राउतले पत्रकारहरूसँग कुरा गर्दै बालक आयुष साहको स्वास्थ्य अवस्था अस्पतालमा ल्याउँदासम्म नै अत्यन्त गम्भीर (क्रिटिकल) रहेको दाबी गरे।

राउतका अनुसार, “बालकलाई माघ १९ गते अस्पतालमा भर्ना गरिएलगत्तै गरिएको परीक्षण सिटी स्क्यान सहित अन्य रिपोर्ट बाट अवस्था अन्तिम चरणमा थियो र अभिभावकलाई पनि तत्कालै जानकारी दिइएको थियो।”

उनले थपे, “जुनसुकै अस्पताल लगे पनि बचाउने अवस्था थिएन। तर धेरैजसो मानिसले ‘ग्यारेन्टी’ खोज्छन्, जुन कुरा डाक्टरको हातमा हुँदैन।”

सञ्चालक राउतका अनुसार, आयुष साहलाई पछि काठमाडौंस्थित ट्रमा सेन्टर लैजाँदा पनि त्यहाँका चिकित्सकले उस्तै प्रतिक्रिया दिएका थिए। तर घटनापछि सामाजिक सञ्जाल र सार्वजनिक मञ्चहरूमा अस्पतालप्रति अनावश्यक आरोप र बदनाम गर्ने प्रयास गरिएकोप्रति उनले गम्भीर आपत्ति जनाए।

अस्पतालमा ४०–४५ लाख रुपैयाँ खर्च भएको अभिभावकको दाबीसमेत खारेज गर्दै राउतले भने, “हाम्रो बिलअनुसार कुल खर्च करिब १० लाख रुपैयाँ हो। तीमध्ये ३ लाख क्यास तिरिएको छ भने ५ लाखको चेक एक वर्षको म्याद थप गरेर दिइएको छ, जुन हामीले स्वीकार गरेका छौं।”

उनले अस्पतालले सामाजिक उत्तरदायित्व बोध गर्दै लचिलो व्यवहार अपनाएको उल्लेख गरे। “हामी पनि समाजमै बस्ने हो। तर ८ लाख बुझाएर बाँकी रकम नतिरी उल्टै बदनाम गर्ने प्रवृत्ति निन्दनीय छ,” राउतले दुःख व्यक्त गर्दै भने।

अन्त्यमा, सञ्चालक राउतले घटनालाई संवेदनशील मान्दै यथार्थ बुझ्न सबैलाई आग्रह गरे। “हामी बालकको मृत्युबाट दुःखी छौं। तर भावनामा बहिएर तथ्य नबुझी आरोप लगाउनु अनुचित हो,” उनले भने।

यस घटनाले अस्पताल प्रशासनले तथ्यको आधारमा मूल्यांकन गर्न सबै पक्षलाई आग्रह गरेको छ।