नेपाल वैश्य कल्याण महासंघको चौथो राष्ट्रिय महाधिवेशन जनकपुरधाममा सम्पन्न

गिरिजानन्द साह/जनकपुरधाम/असार २८ गते। नेपाल वैश्य कल्याण महासंघको चौथो राष्ट्रिय महाधिवेशन जनकपुरधाममा सम्पन्न भएको छ। वैश्य समुदायको एकता, सामाजिक उत्थान तथा समृद्धि अभिवृद्धिको लक्ष्यसहित आयोजित यस महाधिवेशनले देशभरका वैश्य प्रतिनिधिहरूको व्यापक सहभागिता रहेको थियो ।

महाधिवेशनको अध्यक्षता महासंघका केन्द्रीय अध्यक्ष अमर नाथ गुप्ताले गर्नुभएको थियो भने कार्यक्रमको प्रमुख अतिथि पूर्व गृह राज्यमन्त्री माननीय भरत प्रसाद साह रहनु भएको थियो। प्रमुख अतिथिद्वारा विधिवत रूपमा उद्घाटन गरिएको कार्यक्रममा देशका विभिन्न जिल्लाबाट आएका वैश्य समुदायका प्रतिनिधि, समाजसेवी, बुद्धिजीवी, युवा तथा महिला अगुवा र संगठनका पदाधिकारीहरूको उल्लेखनीय उपस्थिति देखिएको थियो।

कार्यक्रमको उद्घाटन सत्रमा बोल्दै प्रमुख अतिथि साहले वैश्य समुदायको ऐतिहासिक योगदान, आत्मनिर्भरता र उद्यमशील प्रवृत्तिको प्रशंसा गर्दै अबको पुस्ताले शिक्षा, उद्यम र सामाजिक सेवाको समन्वय गर्दै अघि बढ्नुपर्ने आवश्यकता औँल्याए। उनले वैश्य समुदायलाई राजनीतिक, सामाजिक र आर्थिक रूपमा अझ सशक्त बनाउन सामूहिक पहल आवश्यक रहेको बताए।

अध्यक्ष अमर नाथ गुप्ताले महाधिवेशनको औचित्य र उद्देश्य स्पष्ट गर्दै समुदायको हक–अधिकार सुनिश्चित गर्न अबको समय एकतामा जोड दिने समय भएको बताए।

कार्यक्रमको उदघाटन सत्रमा प्रतिनिधिहरूले मन्तव्य राख्दै वैश्य समुदायको समृद्धि र पहिचानका लागि साझा एजेन्डामा अघि बढ्नुपर्ने धारणा व्यक्त गरे। साथै, युवाहरूलाई नेतृत्वमा ल्याउने, महिलाहरूको सहभागिता बढाउने, उद्यमशिलता प्रवर्द्धन गर्ने र वैश्य इतिहास तथा संस्कृतिको संरक्षण गर्ने विषयमा समेत जोड दिइयो।

एकता, सहभागिता र सशक्तिकरणका नारासहित सम्पन्न महाधिवेशनले आगामी दिनमा समुदायको सर्वाङ्गिण विकासका लागि मार्गरेखा तय गरेको विश्वास गरिएको छ।